KQZ: Përparim Rama i LDK, Kryetar i Komunës Prishtinë

Me pjesëmarrje prej 37.85 për qind sot qytetarët e Kosovës përmbyllën edhe raundin e dytë të zgjedhjeve duke zgjedhur 21 kryetar të ri të komunave, duke i dhënë Kosovës dhe kryetarin e ri të Kryeqytetit, Përparim Rama nga Lidhja Demokratike e Kosovës..

Padyshim gara për kryeqytetin ishte me shumë interes dhe kishte dhe epilogun ashtu siç e parashikuan Exit Pollet, garën për çdo votë ku ngadhnjeu Përparim Rama i LDK-së i cili sipas rezultateve paraprake të KQZ mori 51.07 për qind të votave përballë Arben Vitisë të Lëvizjes Vetëvendosje me 48.93 për qind të votave.

Shpalljen e fituesit të Prishtinë e bëri Kryetari i LDK, Lumir Abdixhiku ndërsa fituesi Përparim Rama u shpreh:

“Emocionin e kësaj fitore s’mundem me përshkru me fjalë kjo është fitore e secilit banor pa dallime. Vota jote sot tregon se jemi të emancipuar, vota jote sot më fuqizon me privilegjin me qenë kryetar i Prishtinës, të kryeqytetit që duke qenë i gjithë Kosovës. Unë Përparim Rama kryetar i Prishtinës, zotohem se do të jem kryetar i të gjithëve, që punoni dhe jetoni këtu,” tha Përparim Rama dhe ende pa u zyrtarizuar as 97 për qind e votave të numëruara, kandidati i LVV, Arben Vitia pranoi humbjen:

“Sipas rezultateve që kemi edhe nga komisionerët tanë, Prishtina tashmë ka një fitues, e ai është zotëri Përparim Rama. Shfrytëzoj rastin të falënderoj aktivistët e LVV-së, qytetarër e Prishtinës dhe zotëri Rama po ashtu për një kulturë të përgjithshme dhe fushatë korrekte që karakterizoi Komunën e Prishtinës!”

Ndërkohë në 20 komunat tjera, KQZ publikoi këto rezultate paraprake:

Në Prizren fitoi Shaqir Totaj i PDK ndonëse në raundin e parë kandidati i LVV, Mytaher Haskuka ishte në epëri dukshme tashm duke marrë vetëm 48.99 për qind të votave të pamjaftueshme përballë Totajt i cili mori 51.01 për qind të votave.

Në Gjilan Lufi Haziri i LDK mbylli qeverisjen e tij me 48.97 për qind duke humbur postin e Kryetarit përballë kandidatit të LVV-së, Alban Hyseni,i cili mori 51.03 për qind të votave.

Në Gjakovë, Ardian Gjini i AAK korri një fitore të thellë me 56.06 për qind të votave përballë Mimoza Kusarit të LVV e cila bëri përpjekje për tu ritkhyer në krye të komunës së Gjakovës.

Në Vushtrri, Ferit Idrizi i PDK-së me 53.13 për qind të votave është fitues i kësaj gare ku përball kishte Xhafer Tahirin e LDK-së i cili arriti të marrë 33.82 për qind të votave.

Në Gllogovc, Ramiz Lladrovci i PDK-së me 54.14 për qind të votave fitoi përballë Driton Ajazit nga Demokratët për Drenasin me 45.86 për qind të votave.

Në Fushë Kosovë, pa befasi Burim Berisha i LDK-së fitoi me 66.04 për qind të votave përballë Enver Bajçincës së LVV i cili arrit të marrë 33.96 për qind të votave.

Në Obiliq fitoi Xhafer Gashi nga Iniciativa Qytetare për Obiliqin duke thelluar fitoren e raundit parë me 61.41 për qind të votave, përballë Halil Thaçin të LVV-së i cili 38.59 për qind të votave.

Në Podujevë, Shpejtim Bulliqi i LVV-së konfirmoi postin e kryetarit aktual dhe fitoi me 51.85 për qind të votave përballë Ekrem Hysenit të LDK-së i cili mori 48.16 për qind të votave.

Në Kaçanik Besim Ilazi nga PDK me 53.20 për qind të votave thelloi fitoren nga raundi i parë përballë Jeton Rakës së LVV-së i cili mori 46.80 për qind të votave.

Në Dragash, Shaban Shabani i PDK-së përmbysi rezultatin e raundit të parë dhe mori 50.21 për qind të votave përballë Bexhet Xheladinit nga LDK i cili arriti të marrë 49.79 për qind të votave.

Në Mamushë, Abdulhadi Krasniqi nga Kosova Demokratik Turk Partisi me 63.38 për qind të votave doli fitues përballë Arif Butuqit nga Kosova Adalet Turk Partisi me 36.62 për qind të votave.

Në Istog, Ilir Ferati i LDK-së me 56.20 për qind të votave është i kësaj gare përballë Bekë Berishës nga AAK i cili mori 43.8 për qind.

Në Klinë, Zenun Elezaj nga AAK me 55.11 për qind të votave është fitues përballë Esat Racit nga PDK me 44.89 për qind të votave.

Në Kamenicë, Kadri Rahimaj i LVV-së fitoi me 53.11 për qind të votave përballë Qëndron Kastratit nga PSD me 46.89 për qind të votave duke konfirmuar se posti e kryetarit e mbante vetëm pse ishte votuar nga Lëvizja Vetëvendosje.

Në Viti, Sokol Haliti i LDK-së me 51.48 për qind të votave fitoi përballë Arsim Ademit të LVV-së me 48.52 për qind të votave.

Në Kllokot, Vladan Bogdanoviç i Listës Srpska fitoi me 55.13 për qind të votave përballë Strahinja Spasiçit nga GI Srpska Narodna Sloga i cili mori 44.87 për qind të votave.

Në Rahovec, Smajl Latifi i AAK-së fitoi me 65.32 për qind të votave futet përballë Visar Korenicën të partisë në pushtet, LVV i cili mori 34.68 për qind të votave.

Në Junik, Ruzhdi Shehu i LDK-së me 50.61 për qind të votave fitoi përballë Agron Kuçi nga AAK me 49.39 për qind të votave.

Në Malishevë, Ekrem Kastratit nga Nisma Socialdemokrate me 53.19 për qind të votave fitoi përballë Isni Kilajt të PDK-së me 46.81 për qind të votave.

Në Shtime, Qemajl Aliu i LVV-së me 50.71 për qind të votave fitoi përballë Naim Ismajlit të PDK-së me 49.29 për qind të votave.

Ndryshe, nga 38 komuna sa Kosova, vetëm në 17 prej tyre u arrit të zgjedhen kryetarët e komunave në raundin e parë ndërkohë sot u zgjodhën kryetarët e 21 komunave .