Sot, PD ose Edi Rama!

Sot është dita e gjykimit, jo për fatin e Lulzim Bashës por Partisë Demokratike! Dhe, sot asgjë nuk varet as nga Lulzim Basha si fajtori kryesor i shkatërrimit të PD dhe as nga ai që u projektua në kokën e shumë të zhgënjyerve nga Basha, lideri historik Sali Berisha, por nga anëtarësia e PD ose më saktë delegatët e Kuvendit Kombëtar që me votën e tyre do të vendosin nëse do të vazhdojë të ketë Parti Demokratike ose Edi Ramë me Grup Parlamentar të PD!

Sot akuzat dhe kundërakuzat nuk i duhen më njeriu, asgjë më nuk ka kuptim madje as mbështetja amerikane që e ka projektuar Luli në kokën e tij me ndihmën e mediave të Edi Ramës. Sot Lulzim Basha është fajtori kryesor dhe nëse dështon Kuvendi i sotëm humbësi më i madh do të jetë sërish Lulzim Basha. Pse!

Këtë e konfirmojnë precedentë të shumë e më i afërti është ai Jugosllavisë dhe liderëve të saj. Kur fillloi shpërbërja e Jugosllavisë të gjithë liderët joserbë fërkonin duart për luftën speciale që SHBA po zhvillonte kundër Serbisë, ndonëse direktiva 133 nga viti 1984 merrej kryesisht me Jugosllavinë.

Liderët joserbë ishin të lumtur që me këtë luftë speciale me urdhër të Presidentit Reagan dhe sanksionet e FMN filloi të shkatërrohet Jugosllavia, injoruan paralajmrimet e Helmut Kohl dhe Hans Dietrich Genscher në vitet 1991 se po shkatërohet Jugosllavia, madje edhe propozimin e Presidentit të Komisionit të Bashkësisë E, Jasquez Delors dhe Kryeministrit të Luksemburgut, Jacques Santer, gjatë një vizite në Beograd në majin e këtij viti, për anëtarësimin e menjëhershëm të Jugosllavisë në Bashkësinë Evropiane duke projektuar dhe 5.5 mld dollarë ndihmë financiare për këtë qëllim, kushtëzuar e gjitha kjo me zgjidhjen paqësore të krizës.

Vetëm pak javë më pas, asgjë më nuk kishte kuptim dhe nuk kishte kthim mbrapa ndonëse u angazhuan shumë misione dhe plane paqësore. Në fund të qershorit filloi lufta në Slloveni, dhe kur në majin e vitit 1992 Sllovenia, Kroacia dhe Bosnje Hercegovina ishin anëtare të OKB u kuptua se realiteti është ndryshe ndërkohë në muajin shkurt në Maastricht u firmos Marrëveshja për Bashkimin Evropian. Me përjashtim të Sllovenisë e cila u shkëput menjëherë, në “Jugosllavinë e mbetur” agresori dhe negociatori ishte Sllobodan Millosheviç i cili la qindra mijëra të vdekur, tokë të djegur, me të cilën vazhdon e merret edhe sot si SHBA ashtu dhe BE, dhe nuk po anëtarëson dot në familjen e saj shtetet e dala nga Jugosllavia e shpërbërë.

Meqë, këtu është e qartë se kush është Millosheviçi dhe ai vazhdon e i fërkon duart në krye të qeverisë, për Lulzim Bashën mund të themi se vazhdon të jetë në kohë ndonëse tensionet kanë arritur kulmin dhe për ca orë “Foltorja” fillon me Kuvendin Kombëtar.

Në kohë, sepse në situatën e krijuar kemi dy realitete në PD! “Foltorja” me Kuvendin e sotëm Kombëtar që do mundohet të sjellë ndryshime në Statut, siç thotë, për ta shpëtuar Partinë Demokratike por që i duhet pjesëmarrja e shumicës së delegatëve, e që thotë se e ka.

Dhe nga ana tjetër kemi Kryetarin aktual të PD, Lulzim Basha, i cili vazhdon të jetë në delir me mbështetjen që i shprehu Zv/Ndihmës Sekretari i Shtetit, Gabriel Escobar, dhe mesazhin që dha për “Foltoren” se do të ketë pasoja nëse Partia Demokratike zgjedh dikë që është shpallur NON GRATA.

Kuvendi i “Foltores”

Kur gjithçka është gati për Kuvendin e sotëm Kombëtar, lideri historik i Partisë Demokratike, Sali Berisha, ftoi delegatët e PD që kanë firmosur ose jo formularin, delegatët që mendojnë ndryshe dhe kreun e tyre Lulzim Basha, që të jenë nesër të pranishëm dhe të vendosin me votën e tyre të lirë, rithemelimin e PD.

“Me këtë mesazh dua t’ju përshëndes shumë përzemërsisht. T’ju ftoj ju të gjithë delegatëve dhe delegatet të Kuvendit në rithemelim të PD që keni firmosur ose nuk keni firmosur formularin të jeni nesër të pranishëm, të vendosni me votën tuaj të lirë rithemelimin e PD. Rithemelimin e forcës tonë politike, rikthimin e saj në shtëpinë e lirisë së demokratëve shqiptarë. Në një forcë politike të vlerave tradicionale të shoqërisë sonë. Në një forcë të vërtetë opozitare, të sigurt, që do të udhëheqë revolucionin paqësore të shqiptarëve.

Si dikur përmbysëse e sistemit komunist, sot në përmbysje të narko-shtetit. Rikthimin e votës së lirë për anëtarët, simpatizantët e PD brenda kësaj partie. Rikthimin e votës së lirë për Shqipërinë, shqiptarët në tërësi,” tha Berisha duke ftuar edhe delegatët e Kuvendit Kombëtar që mendojnë ndryshe ku nuk harroi të ftoi as kryetarin aktual Lulzim Bashën.

“Ftoj të gjithë ata delegatë të PD, drejtues të saj kryesor duke përfshirë edhe kryetarin e saj në letër Lulzim Basha, të gjithë drejtuesit dhe deputetët e PD, të gjitha ata që mendojnë ndryshe nga ne të vijnë nesër në rithemelimin e forcës sonë politike.

Ky Kuvend është i të gjithë demokratëve, ftoj të gjithë anëtarët e PD që kanë mbështetur fuqishëm lëvizjen për një PD më të fortë e të bashkuar, dhe më të hapur, por edhe ata që e kanë parë me skepticizëm të vijnë nesër për të ndjekur në stadiumin ‘Air Albania’ për të ndjekur këtë moment të rëndësishëm të historisë, rivendosjen e pluralizmit politik.”

PD e intubuar, Lulzim Basha i feston ditëlindjen

Që nuk është politikan, Lulzim Basha e konfirmoi si më 17 Maj 2017 ashtu dhe më 26 Prill 2021, por që nuk ka fare seriozitet këtë po e vulos çdo ditë me nga një vulë të veçantë prej idioti.

Dhe, derisa Partia Demokratike është asfiksuar dhe disa demokratë idealistë e kanë futur në intubim për ta shpëtuar, Lulzim Basha bënë party dhe shpërndanë ftesa për kremtimin e ditëlindjes së PD.

Sa do ti përgjigjen kësaj ftese nuk dihet, por ata që nuk kanë respekt për veten dhe festojnë sot me Lulzim Bashën mirë është ta lexojnë historinë e shpërbërjes së Jugosllavisë për të kuptuar se çfarë ndodhi me ata që krekoseshin me mbështetjen amerikane që kishin për të shkatërruar Serbinë ndërkohë lufta speciale amerikane i dedikohej shkatërrimit të komunizmit dhe Jugosllavisë, dhe në fund e lutën Amerikën me kuç e me maç ti ndihmoj për të vendosur paqen në tokën e tyre.

Ndërsa “Foltorja” e ka pak më të thjeshtë! Ajo duhet të konfirmoi shumicën dhe doemos i duhet të zhvilloj këtë Kuvend, i cili sot i jep fund ose keqmenaxhimit dhe dështimeve 8 vjeçare të liderit të partisë më të madhe opozitare ose ndryshe pëson Partia Demokratike, fund i cili do ti shërbej vetëm Edi Ramës.

Ndërkohë Lulzim Basha dhe vetëm ai do të identifikohet si lideri i cili pas 8 vjet dështimesh, shkaktoi pakënaqësi ndër demokratë, e përçau dhe i dha fund partisë së parë të pluralizmit shqiptar pas gjysëm shekulli të komunizmit barbar, Partisë Demokratike!