Vjosa kthehet në shtratin e saj, përmirësohet situata në Fier, Vlorë e Lezhë

Mëngjesin e sotëm niveli i Vjosës ka ra ndjeshëm dhe raportohet se po përmirësohet situata në Vlorë e Fier por dhe në Lezhë ndonëse dhjetërsa shtëpi dhe hektarë të tërë të tokës bujqësore kanë ngel nën ujë.

Në fshatrat e Vlorës buzë Vjosës, situata është normalizuar. Përmirësimi i motit ka sjellë ulje të prurjeve në lumin Vjosa, i cili dje përmbyti 17 banesa ndërsa aktualisht niveli është 6.6 metra, por që nuk paraqet rrezikshmëri. Në orët në vijim pritet ende një përmirësim i ndjeshëm i situatës. Edhe situata në qytetin e Vlorës është normalizuar. Trafiku detar i është kthyer normaliteti dhe trageti ka ardhur në orar, raporton BW, ndërkohë ka nisur të bëhet bilanci i dëmeve të shkaktuara dje nga përmbytjet në fshatin Novoselë, Fitore dhe zona të tjera.

Në këtë situatë dhe me këtë qeveri, kur banorët dëgjojnë Kryetarin e Grupit Parlamentar të PS, Taulant Balla, banorët e zonës së përmbytur janë të gëzuar që nuk është përsëritur situata e vitit 2015 ku u përmbytën mbi 200 shtëpi, ndërkohë në fshatrat e Fierit, situata sot duket e qetë dhe banorët e evakuuar janë rikthyer në banesa.

Ferrasi është një nga zonat më të goditura nga përmbytjet e Vjosës. Sipërfaqe të tëra toke ndodhen ende nën pushtetin e ujit. Aktualisht niveli i Vjosës është ulur në mënyrë të konsiderueshme, gjë që ka sjellë dhe rënien e nivelit në kanalet kulluese. Burime nga Shtabi i Emergjencave bëjnë me dije se dhe familjet e evakuara një ditë më parë janë kthyer në banesat e tyre. Në terren, raporton BW, janë përfaqësues dhe punonjës të pushtetit lokal që po shohin nga afër situatën.

Duket se përmirësimi i kushteve atmosferike po sjell dhe përmirësimin e situatës nga përmbytjet edhe në Qarkun e Lezhës. Situata paraqitet e qetë, ndërkohë që janë 100 hektarë tokë nën pushtetin e ujit ndërsa Shtabi i Emergjencave Civile raporton se është në rënie.

Nga raportimet e strukturave të MC, kemi:
“Niveli i ujërave në shtretërit e lumenjve dhe sistemin kullues është në kuota normale. Hidrovoret punojnë me kapacitet të plotë. Në kënetën e Kakarriqit, nj.ad. Balldre, bashkia Lezhë, kemi rreth 100 ha tokë depresive me prezencë ujit, por në rënie. Rezervuarët janë në monitorim,” raporton Emergjenca Civile duke shtuar se rrugët nacionale, rurale dhe bashkiake, janë të kalueshme pa problem ndërsa furnizimi me energji elektrike po mbahet nën kontroll.