Deklarimi i pasurisë nga zyrtarët, ILDKPKI: Të plotësohet online deri në 31 mars

Zyrtarët që kanë detyrimin e deklarimit të pasurisë sipas kuadrit ligjor, duhet të bëjnë plotësimin e kësaj deklarate online deri më 31 mars 2022.

Inspektorati i Lartë i Deklarimit të Kontrollit dhe Pasurive dhe Konfliktit, ILDKPKI, të Interesit njoftoi se kjo është një procedurë periodike vjetore që kryhet nga të gjithë subjektet në funksion.

“Inspektorati i Lartë i Deklarimit dhe Kontrollit të Pasurive dhe Konfliktit të Interesave, ju sjell në vëmendje subjekteve të cilët mbartin detyrimi për deklarim se, duke filluar nga data 1 Janar 2022 deri më 31 Mars 2022 duhet të plotësojnë deklaratën e interesave private në sistemin elektronik EACIDS, duke aksesuar linkun: https://deklarimi.ildkpki.al/

Sipas njoftimit, Autoritetet Përgjegjëse për Parandalimin e Konfliktit të Interesit pranë institucioneve publike, duhet të marrin të gjitha masat për njoftimin dhe këshillimin e zyrtarëve në institucionet përkatëse, si dhe në ato të varësisë” thuhet në njoftimin e ILDKPKI.

Sipas ligjit janë një kategori e caktuar zyrtarësh që duhet të deklarojnë çdo vit duke nisur nga Presidenti i Republikës tek Kryeministri dhe kabineti e tij , gjyqtarët nëpër shkallë të ndryshme të gjyqësorit, zyrtarët e nivelit të lartë dhe të mesëm drejtues, prefektët, drejtorët në drejtoritë qendrore dhe rajonale administratorët e shoqërive anonime ku ka pjesëmarrje kapitali edhe shteti.

Në deklarim duhet të përfshihen të gjithë elementët ndër të tjera pasuri të luajtshme e të paluajtshme, sende me vlerë të veçantë, aksione, vlerën e likuiditeteve në cash, licencat dhe patentat që sjellin të ardhura, dhuratat e trajtimet preferenciale e deri tek çdo shpenzim i deklarueshëm.

Deklarimi bëhet për aq kohë sa zyrtari mban pozicionet e përshkruara nga ligji. Në rast largimi nga funksioni deklarimi kryhet vetëm një herë për periudhën nga deklarimi i fundit deri në datën e largimit, me përjashtim të rastit kur zyrtari fillon punë në një detyrë tjetër, që, sipas këtij ligji, vazhdon të mbartë detyrimin për deklarim.

Në deklarimin pas largimit nga funksioni jepen vetëm ndryshimet e ndodhura në pasuritë, detyrimet financiare dhe interesat privatë, për periudhën nga deklarimi i fundit deri në datën e largimit nga funksioni. Deklarimi kryhet jo më vonë se 15 ditë nga data e largimit nga funksioni./Monitor/