Scholz i kërkon Putinit të ndalojë sulmin në Ukrainë dhe ti hap rrugë diplomacisë
Mëngjesi i sotëm në Ukrainë ka zbardhur me sulmet ruse mbi Kiev, Harkiv dhe Kramatorsk ndërkohë kancelari gjerman, Olaf Scholz, i ka bërë thirrje presidentit rus, Vladimir Putin që të urdhërojë ndaljen e sulmit të Moskës në Ukrainë, dhe të mundësojë zgjidhje diplomatike, duke shmangur edhe katastrofën humanitare.
Zyra e kancelarit Scholz, raporton RFE, ka bërë të ditur se të dy liderët kanë folur në telefon për gati një orë lidhur me luftën në Ukrainë dhe përpjekjet për t’i dhënë fund asaj.
Nuk janë dhënë detaje tjera, mirëpo Kremlini është shprehur se pala ruse është e gatshme për të kërkuar zgjidhje, në përputhje me qasjet e saj parimore.
Prej sulmit të paprovokuar të Moskës në Ukrainë, më shumë se 187.000 persona kanë shkuar në Gjermani, ka thënë Ministria e Brendshme në Berlin.
Më shumë se dy milionë refugjatë kanë hyrë në Poloni dhe një pjesë e tyre më pas ka kaluar në shtetet tjera.
Zëdhënësi i Kremlinit, Dmitry Peskov tha sot në Moskë se Putin pritet të zhvillojë një bisedë telefonike edhe me presidentin francez, Emmanuel Macron.
Ndërkohë raportohet se një person është vrarë në Kiev dhe katër tjerë janë plagosur pasi një raketë e rrëzuar ruse ka rënë në një ndërtesë banimi në pjesën veriore të Kievit, kanë thënë shërbimet e emergjencës. Shërbimet kanë raportuar se 12 persona janë shpëtuar dhe 98 tjerë janë duke u evakuuar nga ndërtesa pesëkatëshe në rajonin Podilski. Sipas tyre, përpjekjet për kërkim-shpëtim janë duke vazhduar.
Ndërsa pas bombardimeve në një qendër edukative dhe ndërtesa banimi në Harkiv, shërbimet e emergjencës kanë raportuar se 1 person është vrarë dhe 11 janë plagosur. Sulmi ka dëmtuar rëndë ndërtesën edukative, bashkë me dy blloqe banimi, kanë thënë autoritetet. Zjarrfikësit kanë arritur të ndalin zjarrin dhe janë duke punuar për të nxjerrë njerëzit nga rrënojat.
Fatkeqësisht sulmeve ajrore sot nuk i ka shpëtuar as lindja e Ukrainës ku ka pësuar qyteti i Kramatosrkut, dhe si pasojë e sulmeve ajrore kanë mbetur dy të vrarë. Guvernatori rajonal, Pavlo Kyrylenko tha se gjashtë persona janë plagosur në sulmin në një ndërtesë banimi dhe në një bllok administrativ.
Ndryshe, në ditën e 23-të të luftës raporton RFE, Ministria ukrainase e Mbrojtjes tha në përditësimin e fundit se 14.200 ushtarë rusë janë vrarë prej shpërthimit të konfliktit.
Si Ukraina, ashtu edhe Rusia prezantojnë të dhëna të ndryshme për fitoret dhe humbjet e palës tjetër. Rusia ka pretenduar më 3 mars, se 498 trupa të saj janë vrarë në luftime, mirëpo prej atëherë nuk ka përditësuar të dhënat.
Zyrtarët amerikanë janë shprehur se numri i viktimave ruse mund të jetë mbi 7.000 dhe i të plagosurve mbi 14.000.
Ukraina po ashtu ka pretenduar se ka shkatërruar 450 tanke ruse, 93 aeroplanë, 112 helikopterë dhe ka dëmtuar 43 sisteme kundërajrore.
