Hungari, Orban: Fitore e thellë e Fidesz, shihet nga Hëna!

Kryeministri hungarez Viktor Orban duke shpall fitoren e partisë së tij, Fidesz, në zgjedhjet e djeshme parlamentare, tha se kemi mbrojtur lirinë dhe sovranitetin e Hungarisë.

I shoqëruar nga krerët e partisë tij, Orban 58 vjeç, në mënyrë triumfale tha se kanë realizuar fitoren përkundër parashikimeve të këqija.

“Kemi korrur fitore aq të madhe sa shihet edhe nga Hëna,” tha Orban duke shtuar:

“Kemi mbrojtur sovranitetin dhe lirinë e Hungarisë.”

Rezutatet paraprake pas 98 për qind të votave të numëruara e nxerrin fitues Fidesz të Viktor Orban me 53.1 për qind të votave të fituara që pasohet nga Koalicioni i gjashtë partive opozitare të Peter Marki Zaya e cila ka marrë 35 për qind të votave. Gjithashtu, Fidesz është në epërsi në 88 nga 106 njësi zgjedhore ku fitohet nga 1 deputet.

Në fjalën e tij me rastin e shpalljes së fitores, Orban kritikoi burokratët e Brukselit dhe Presidentin e Ukrainës, Volodymyr Zelensky, duke i qujatur “kundërshtarë”, raporton BBC.

Ndryshe, Hungaria e cila është në kufi me Ukrainën, deri më tani ka pranuar mbi 500 mijë refugjatë ukrainas. Orban vazhdon të angazhohet për të ndihmuar njerëzit por refuzon ta furnizoj Ukrainën me armë. Kështu, thotë Viktor Orban, e mbanë Hungarinë jashtë luftës.