23 vjet nga Masakra e Rezallës, Kurti: Dëshmi e gjenocidit serb në Kosovë!
“98 burra dhe djem u grumbulluan dhe u ekzekutuan nga forcat serbe. Kjo masakër është dëshmi e gjenocidit të Serbisë në Kosovë,” kështu u shpreh Kryeministri i Kosovës, Albin Kurti, pas homazheve në 23 vjetorin e Masakrës së Rezallës duke kërkuar nga drejtësia vendore edhe ajo ndërkombëtare që të veprojnë në mënyrë që përgjegjësit të gjykohen e dënohen për këto krime.
“Kjo masakër është dëshmi e gjenocidit të Serbisë në Kosovë. Para disa muajve u patën rivaarrosur këtu 9 kufoma të 9 martirëve. Pas ekzekutimit kufomat u patën dërguar në serbi. Pra me ekzekutim mizor ua vodhën jetën e pastaj edhe kufomat. Gjenocidi i Serbisë njihet botërisht andaj edhe drejtësia vendore edhe ajo ndërkombëtare duhet me ngulm të veprojnë në mënyrë që përgjegjësit të gjykohen e dënohen. Lavdi dëshmorëve dhe martirëve të kombit,” tha Albin Kurti i shoqëruar nga ministri i Mbrojtjes, Armend Mehaj dhe komandanti i FSK-së, Bekim Jashari.
Ndërkohë Presidentja e Kosovës, Vjosa Osmani, duke përkujtuar Masakrën e Rezallës ku në mënyrë mizore u vranë 98 djem e burra tha se si për Rezallën dhe çdo vend të Kosovës ku janë kryer krime nevojitet drejtësi.
“Duke u përpjekur t`i fshehin gjurmët e krimit, autorët zhdukën 44 viktima, një pjesë e të cilëve u gjetën vite më pas në një varrezë masive në Rudnicë të Serbisë. E vërteta nuk mund të fshihet, ndaj do të jetë përkushtim i yni i vazhdueshëm. Për Rezallën dhe çdo vend të Kosovës ku janë kryer krime nevojitet drejtësi. Të rënët në këtë Masakër nuk do të harrohen kurrë dhe bashkë me përvjetorët e lirisë do të kujtohen çdoherë!”
Ndryshe, sot mbushen 23 vjet nga masakra në Rezallë të Skenderajt, ku ushtria dhe policia serbe ekzekutuan 98 shqiptarë, banorë të Rezallës dhe fshatrave përreth, nga të cilët 44 ishin munduar t’i zhdukin.
Një pjesë e trupave u gjenden në Rudnicë të Rashkës dhe iu dorëzuan familjarëve.
Nga masakra e 5 prillit 1999 në Rezallë, ku serbët pushkatuan pothuajse të gjithë burrat dhe djemtë e rinj kanë shpëtuar vetëm tre banorë.
Kjo masakër konsiderohet si një ndër masakrat më të pamëshirshme gjatë luftës në Kosovë.
