“Platforma për bashkim”, reagon PD: Në Kuvendin e 30 Prillit, të paraqesim e votojmë çdo platformë

Pas prezantimit të Platformës për bashkim nga Kryetari i Grupit Parlamentar të PD, Enkelejd Alibeaj, ka reaguar Partia Demokratike përmes anëtarit të Komisionit të Rithemelimit dhe deputetit Flamur Noka duke theksuar se koha e përjashtimeve ka përfunduar dhe bashkë me të dhe koha kur vullneti i shumicës injorohej.

“Mirëpresim të gjithë ata që janë bërë apo kërkojnë të bëhen pjesë e këtij procesi, por nuk do të lejojmë askënd që ta pengojë atë për shkak të frikës që Basha-Alibeaj kanë nga përballja me vullnetin e demokratëve. Jemi të gatshëm që me grupe auditi të verifikohet çdo procedurë zgjedhore, nëse është zhvilluar konform statutit të PD miratuar në Kuvendin Kombëtar të 11 dhjetor 2021 dhe udhëzimeve përkatëse. Bashkimi vjen përmes votës së lirë,” thekson Flamur Noka duke shtuar se kush dëshiron të lidhë fatin e tij me veglat e Edi Ramës është i lirë ta bëjë, por koha e pengmarrjes së opozitës ka marrë fund!

“Kuvendi është Forumi më i lartë vendimmarrës në Partinë Demokratike. Askush nuk ka tagër të diskutojë e aq më pak të anullojë vendimet e tij, pasi kështu do të vijonte praktika e shëmtuar ku mendimi I anëtarësisë nuk përfillej,” shprehet në reagimin e tij anëtari i Komisionit Rithemelimit, Flamur Noka duke përfunduar:

“Të gjithë të bashkohemi në Kuvendin Kombëtar të 30 Prillit. Le të flasim hapur dhe ndershëm, le të paraqesim çdo platformë dhe të votojmë çdo propozim të hedhur.”

Ndryshe,

Kryetari i Grupit Parlamentar të PD, Enkelejd Alibeaj, duke prezantuar sot Platformën për bashkimin e PD tha se prej fillimit ka bërë thirrje dhe akte për bashkim, dhe pas përgjigjes pozitive të Bashës ndaj kërkesës së 36 deputetëve që të bëjë një hap pas, sot 31 deputetë i kërkojnë Sali Berishës ta bëjë një gjë të tillë.

Deklaratë:

• VULLNETI I ANËTARËSISË SË PARTISË DEMOKRATIKE VENDOS QËNDRIMIN POLITIK TË SAJ

• VOTA E LIRË DO TË RESPEKTOHET DERI NË FUND!

• VENDIMET E KUVENDIT KOMBËTAR RESPEKTOHEN DHE ZBATOHEN

Grupi parlamentar është një organ shumë i rëndësishëm i Partisë Demokratike. Partia Demokratike është e vendosur të respektojë dhe të garantojë të drejtat statutore të cdo organi, por mbi të gjitha është vullneti i anëtarësisë së Partisë që vendos qëndrimin politik të saj.

Me këtë rast, theksoj, se askush nuk do mundet më të organizojë procese ku 1958 karrike të lexohen si 5004 delegatë.

Askush nuk do mundet më, të zëvendësojë votën e lirë me blinda apo gaz lotsjellës.
Askush nuk mundet më të manipulojë me firma fiktive vullnetin e deputetëve dhe grupit parlamentar të PD.

Koha e përjashtimeve ka përfunduar dhe bashkë me të dhe koha kur vullneti i shumicës injorohej.
PD ka qenë dhe mbetet e hapur për të diskutuar në frymë konstruktive me çdo deputet dhe demokrat për problematikat sepcifike që mund të kenë konstatuar në zonat e tyre.

Për këtë arsye, jemi të gatshëm që me grupe auditi të verifikohet çdo procedurë zgjedhore, nëse është zhvilluar conform statutit të PD miratuar në Kuvendin Kombëtar të 11 dhjetor 2021 dhe udhëzimeve përkatëse.

Por në asnjë rast, dhe në asnjë rrethanë, procesi I nisur prej muajsh nga Kuvendi i 11 Dhjetorit dhe i rikonfimuar bindshëm nga vota e demokratëve në zgjedhjet e 6 marsit, nuk do të ndalojë!

Mirëpresim të gjithë ata që janë bërë apo kërkojnë të bëhen pjesë e këtij procesi, por nuk do të lejojmë askënd që ta pengojë atë për shkak të frikës që Basha-Alibeaj kanë nga përballja me vullnetin e demokratëve.

Bashkimi vjen përmes votës së lirë.

Deri më sot ajo ka qenë e vonuara e madhe. Nuk kemi më kohë për të humbur! Kush dëshiron të lidhë fatin e tij me veglat e Edi Ramës është i lirë ta bëjë, por koha e pengmarrjes së opozitës ka marrë fund!

Të gjithë ne deputetë apo anëtarë të thjeshtë jemi të detyruar të pranojmë vendimet e kuvendit Kombëtar të 11 Dhjetorit që detyroi process zgjedhor dhe Kuvendin e rradhës.

Kuvendi është Forumi më i lartë vendimmarrës në Partinë Demokratike. Askush nuk ka tagër të diskutojë e aq më pak të anullojë vendimet e tij, pasi kështu do të vijonte praktika e shëmtuar ku mendimi I anëtarësisë nuk përfillej.

Të gjithë të bashkohemi në Kuvendin Kombëtar të 30 Prillit. Le të flasim hapur dhe ndershëm, le të paraqesim cdo platformë dhe të votojmë cdo propozim të hedhur.

Në fund të respektojmë votën dhe vendimet e Kuvendit Kombëtar.