Holandë, policia qëllon me armë zjarri mbi fermerët që protestojnë

Policia holandeze ka qëlluar mbi fermerët që protestojnë për shkak të kufizimeve shtetërore të përdorimit të plehrave artificiale dhe politikave tjera, që do të detyrojnë fermerët të ulin numrin e bagëtive.

Protestat janë instensifikuar muajt e fundit, dhe janë vazhdim i protestave nga viti 2019 kur u mbajtën dhe protestat e para në krahinat Frizia dhe Brabant Verior, që detyruan autoritetet të anulojnë ligjin e kontestuar.

Fermerët me traktorë vazhdojnë të bllokojnë rrugët, autostradat dhe supermarketet si dhe bllokojnë hyrjet në qytete dhe aeroporte. Situata u përshkallëzua kur policia qëlloi me armë zjarri mbi protestues.

Përveç ligjit i cili detyron fermerët të ulin numrin e bagëtive, ata si arsye të protestës theksojnë mungesën e respektit të shoqërisë ndaj tyre si dhe rritjen e rregullave shtetërore në sektorin bujqësor, për të cilin lobojnë partia e të gjelbërve GroenLinks dhe ajo social-liberale Democrats 66.

Ndryshe, qëllimi i këtyre kufizimeve, theksojnë autoritetet, është ulja e emetimit të ndotësve, kryesisht oksidit të azotit dhe amoniakut, për 50 për qind në gjithë vendin deri në vitin 2030. Ministrat theksojnë se bëhet fjalë për një tranzicion të pashmangshëm që ka për qëllim të përmirësoj cilësinë e ajrit, tokës dhe ujit.