Në prag të Konferencës së parë Ndërqeveritare, Berisha: Siguroj BE, KE dhe vëndet anëtare se PD…

Në prag të Konferencës Ndërqeveritare që pritet të zhvillohet në Bruksel, Kryetari i Partisë Demokratike, Sali Berisha, duke shprehur mirënjohjen për vendimin për hapjen e negociatave të Shqipërisë me Bashkimin Europian për Komisionin Europian dhe vëndet anëtare të BE-së i ka siguruar se PD sot në opozitë dhe nesër në pushtet do të ndërmarrë dhe miratojë çdo akt, vendim, ligj dhe reformë të nevojshme për avancimin e procesit të integrimit të vendit në BE.

“Këto ditë, do të mbahet Konferenca e parë e Qeverisë Shqiptare me Komisionin Europian, akt që shënon hapjen e negociatave midis Shqipërisë dhe Bashkimit Europian, hapje që me terma konkrete ndodh në një kohë të dytë, pas konferencës së parë.

Me këtë rast, në emër të Partisë Demokratike, e cila ka qenë dhe mbetet lokomotivë e proceseve të integrimit, shpreh mirënjohjen më të thellë dhe falenderimin më të përzemërt për Komisionin Europian dhe vëndet anëtare të BE-së për vendimin e tyre fisnik dhe miqësor ndaj Shqipërisë, aspiratave të shqiptarëve për integrimin e plotë të vendit të tyre në BE, si e ardhmja më e shkëlqyer e këtij vendi,” thekson Sali Berisha duke i kërkuar gjithashtu sot Edi Ramës, publikisht që në përgjigje të këtij vendimi fisnik të vëndeve anëtare dhe Komisionit Europian, të mos guxojë të provokojë partnerët tanë:

“Por, të deklarojë menjëherë se, ai heq dorë përfundimisht nga ligji i aministisë fiskale, kundër të cilit është shprehur haptas Komisioni Europian; Janë shprehur qartë dhe vende anëtare të BE, qoftë dhe me karriget bosh në takimin e tij të fundit; Janë shprehur kundër edhe parnerët tanë jashtë BE-së; Janë shprehur kundër Dhomat e Biznesit të SHBA, Gjermanisë, Francës, Turqisë dhe dhomat e biznesit shqiptar,” tha Kryetari i PD duke shtuar se Edi Rama duhet të kuptojë se problemi më madhor që vëndet anëtare të BE-së dhe partnerët tanë kanë me Shqipërinë është kriminaliteti shqiptar dhe eksportimi i tij në vendet të tjera.

“Legalizmi i parave të krimit të shqiptarëve është mesazhi më i keq që iu dërgohet këtyre vendeve, agjensive të tyre të zbatimit të ligjit dhe inkurajimi i madh për organizatat kriminale shqiptare. Nga ana tjetër, unë iu bëj thirrje qeverive të vëndeve anëtare dhe Komisionit Europian të insistojnë gjer në fund kundër miratimit të këtij ligji, që dëshmon lidhjet e tmerrshme të regjimit të Edi Ramës me organizatat kriminale brenda dhe jashtë vendit.”

Ndryshe, PD angazhohet para partnerëve se me të ardhur në pushtet ajo do të invalidojë aministinë fiskale e kriminale të Edi Ramës dhe do të vendosë para ligjit të gjithë personat që kanë përfituar nga kjo amnisti, duke u kërkuar origjinën e të ardhurave, shprehet Kryetari i PD, Sali Berisha, duke përfunduar:

“Emrat e këtyre personave do t’u jepen një për një, po ashtu organeve fiskale e të drejtësisë së vendeve perëndimore që të përndiqen dhe atje nëse kanë eventualisht vendqëndrime në BE apo Britaninë e Madhe, SHBA, Kanada, etj. Si përfundim, edhe njëherë i shpreh mirënjohje BE së për hapjen e negocjatave, turp bukashkalit Edi Rama nëse ai nuk tërhiqet nga legalizimi i parave që mafia shqiptare ka grumbulluar kriminalisht jashtë dhe brenda vendit.”