Mbikëqyrja elektronike, KLSH: Fondet e buxhetit janë përdorur pa efektivitet
Kontrolli i Lartë i Shtetit, KLSH, ka nënvizuar në një auditim të tij të fundit se fondet e buxhetit të përdorura për mbikëqyrjen elektronike nga Drejtoria e Përgjithshme e Shërbimit të Provës janë përdorur pa efektivitet.
Kjo lidhet me faktin që mbikëqyrja nuk ka funksionuar dhe tashmë insitucionet dhe kompania me të cilën është prishur kontrata kanë qenë të përfshira në një beteje ligjore që vijon.
Sipas KLSH-së “nga auditimi i veprimtarisë së Drejtorisë së Mbikëqyrjes Elektronike, DME, u konstatua se për periudhën 2018-2019, kjo drejtori nuk ka qënë në eficencë të plotë për të përmbushur shërbimin e ME, pasi funksionimi i “pajisjes së gjurmimit” ka paraqitur një sërë problematikash të cilat nuk kanë mundësuar teknikisht funksionimin e saj”.
Auditimi vëren se për pasojë, nga gushti i vitit 2017, Drejtoria e Përgjithshme e Shërbimit të Provës (DPSHP) nuk ka zbatuar asnjë urdhër ekzekutimi për mbikëqyrje elektronike si dhe pas dy vitesh testim dhe monitorim të sistemit të mbikëqyrjes elektronike, Ministria e Drejtësisë ka zgjidhur në mënyrë të njëanshme kontratën nr.8383/10 prot., datë 21.02.2017, për shkak se ka dështuar funksionimi efektiv i pajisjes së gjurmimit.
“Për pasojë, nga data 20.09.2019, në të cilën është zgjidhur zyrtarisht kontrata e sipërcituar e në vijim (deri 30.06.2021 periudhë nën auditim), DME, nuk ka qënë eficente dhe nuk ka përmbushur detyrimet ligjore për të cilat është krijuar, pasi nuk ka realizuar procesin e mbikëqyrjes elektronike, duke sjellë përdorimin pa efektivitet të fondeve buxhetore në lidhje me shpenzimet e kryera për pagat e punonjësve të drejtorisë së ME në vlerën 14,291,182 lekë llogaritur për periudhë”, thuhet në dokumentin e KLSH.
Ky i fundit ka rekomanduar që Ministria e Drejtësisë të marrë masa për të bërë efektiv stafin që lidhet drejtpërdrejt me mbikëqyrjen elektronike.
“Drejtoria e Përgjithshme e Shërbimit të Provës, të marrë masa të menjëhershme duke kërkuar nga organi qendror/ministria e Drejtësisë vënien në eficencë të DME dhe stafit të saj, me qëllim funksionimin e kësaj drejtorie”, rekomandon KLSH./Monitor/
