Turizmi në krizë, Kryeministri akuzon: Më lehtë të shkosh në Greqi, Mal të Zi apo Kroaci se Dhërmi!

Kryeministri Edi Rama kurrë nu ka faj, as kur nuk rriten rrogat e pensionet, as kur abuzohet me ndihmat sociale, as kur rritet çmimi i naftës dhe së fundi as kur plazhet shqiptare janë bosh! Si gjithmonë e gjenë fajtorin, e sot, jo për herë të parë iu ndërsye biznesit.

“Ekonomia ndikohet nga marrëzia e vendosjes së çmimeve, që e bëjnë shumë më të lehtë të shkosh në Greqi, Mal të Zi apo Kroaci se sa të rrish në Dhërmi. Vërtetë është i mrekullueshëm Dhërmiu, por jemi ende larg për të garantuar cilësi shërbimesh. Ata që garantojnë të cilësi ti kenë çmime më të ulta, se sa dikush që hap një derë dhe i kërcet 200-300 euro nata, është e palogjikshme,” tha Edi Rama gjatë një takimi me kryetarët e bashkive të Qarkut Vlorë ndërsa bëri edhe espertin e operatorit turistik:

“Të shohësh hartën e frekuentimit ka kontradikta të forta përgjatë listës. Nuk është as faj as kompetenca juaj, por një rol duhet ta merrni përsipër. Lezha ka vënë një çmim tavan, pasi nuk mund të rritet çmimi i çadrave përtej tavanit. Është stërplot në Lezhë. Po të shohësh flamujt e vendeve të ndryshme që janë shtuar në grupin e turistëve në atë zonë, e kupton se gjëja duhet se ka një balancë mes asaj që ofron dhe asaj që paguan,” tha Kryeministri Edi Rama i cili foli për gjithçka por jo për mungesën e rojeve të plazhit që po lënë pas edhe këta pak turistë duke u mbytur ndërsa përfundoi:

“Dua të nënvizoj nevojën për t’u fokusuar më shumë te përmbajtja e sezonit nga pikëpamja artistike. Jemi në mangësi në ofertën për fëmijët. Kjo është më evidentja.”