Me Osmanin dhe Kurtin, Blinken: SHBA mbështesin integrimin euroatlantik të Kosovës
“Jemi duke punuar së bashku për të përcaktuar disa çështje që janë të rëndësishme për SHBA-në dhe shtetin tuaj,” tha Sekretari amerikan i Shtetit, Antony Blinken pas takimit me presidenten e Kosovës, Vjosa Osmani dhe kryeministrin, Albin Kurti në Washingon, ndërsa falënderoi delegacionin e Kosovës për pritjen e afganëve dhe mbështetjen e Kosovës për Ukrainën.
Blinken, raporton RFE, gjithashtu tha se kanë diskutuar edhe për çështjet kritike të sigurisë rajonale, por nuk dha më shumë detaje.
Met today with President Osmani and Prime Minister Kurti of Kosovo. The United States supports Kosovo’s Euro-Atlantic and international integration and the EU-facilitated Kosovo-Serbia Dialogue. We appreciate Kosovo’s hospitality to Afghans and its firm support for Ukraine. pic.twitter.com/cNIrY2EwwY
— Secretary Antony Blinken (@SecBlinken) July 26, 2022
“Shtetet e Bashkuara e mbështesin integrimin euroatlantik dhe ndërkombëtar të Kosovës, si dhe dialogun Kosovë-Serbi të lehtësuar nga BE-ja,” thekson Antony Blinken përmes rrjetit social Twitter.
Ndërsa Presidentja e Kosovës, Vjosa Osmani, pas takimit me Sekretarin e Shtetit Blinken, tha që takimi ishte i shkëlqyeshëm dhe edhe një herë u konfirmua që Kosova nuk ka mik më të madh e më të mirë sesa SHBA-të.
Vjosa Osmani tha se kanë biseduar edhe për fuqizimin e subjektivitetit të Kosovës në arenën ndërkombëtare, nevojën e Kosovës që të jetë anëtare e NATO-s, si dhe për rolin konstruktiv të Kosovës në dialogun me Serbinë.
Në këtë takim ajo tha se kanë biseduar në detaje për disa nga marrëveshjet e arritura në kuadër të këtij procesi, siç është ajo e energjisë dhe shtoi se administrata e SHBA-së ka qenë e qartë që procesi i dialogut të përqendrohet në njohje reciproke, “gjë që është konfirmuar edhe sot gjatë këtij takimi”.
Një çështje tjetër e ngritur në takim, raporton RFE, ishte edhe roli që ka Rusia në destabilizimin Ballkanit Perëndimor nëpërmjet “satelitit të saj të Serbisë”.
“Sekretari Blinken, njësoj sikurse presidenti Biden, e njohin shumë mirë këtë histori të intencave ruse në rajonin tonë dhe në asnjë moment nuk e largojnë vëmendjen e tyre, gjë që na konfirmuan edhe sot, në mënyrë që bashkërisht të punojmë që t’i ndalim këto tendenca për destabilizim në rajonin tonë,” tha Presidentja Vjosa Osmani duke shtuar se populli i Kosovës qëndron me Ukrainën dhe përmendi sanksionet që Kosova i ka vendosur Rusisë, siç tha ajo në ditën e njëjtë që i ka miratuar dhe Amerika.
Ndërkohë kryeministri Albin Kurti tha se nga Sekretari amerikan i Shtetit kanë kërkuar shtimin e investimeve amerikane në Kosovë si dhe rritjen e shkëmbimit tregtarë midis dy vendeve.
“Në kontrast me disa fuqi të tjera nëpër botë, të cilat dëshirojnë të tregojnë që për zhvillim ekonomik demokracia nuk është e nevojshme, shteti jo i madh i Kosovës është një shembull i madh se zhvillimi ekonomik dhe demokracia cilësore shkojnë së bashku,” tha Albin Kurti pas takimit.
Ndryshe, Presidentja dhe Kryeministri i Kosovës sot do të marrin pjesë në ceremoninë e nënshkrimit të marrëveshjes për Programin Kompakt me Korporatën Sfidat e Mijëvjeçarit, një projekt në vlerë prej 236.7 milionë dollarësh, me të cilin Kosova pritet të forcojë pavarësinë energjetike.
