Pogradeci i shpërfillur, Berisha: Kjo nuk është një betejë për pushtet, por për shpëtim kombëtar!

Kjo nuk është një betejë për pushtet, por për shpëtim kombëtar, tha Kryetari i Partisë Demokratike, Sali Berisha, gjatë një bashkëbisedimi me intelektualët e Pogradecit duke shtuar se shpresa e vetme për të ndryshuar gjërat në mënyrë paqësore është vota, ndonëse e pranoi se pushteti është i përqendruar në një dorë më shumë se pas shkurtit të vitit 1991.

Reforma Soros në drejtësi i ka prerë kolonën vertebrale shtetit shqiptar , tha Berisha, ndërsa Harta është një ‘colpo di gracia’ tjetër mbi të drejtat e qytetarëve shqiptarë në kundërshtim me ligjin, për të cilën u zotua se PD do ta anulojë me ardhjen në pushtet.

“Ju trajtuat jo vetëm problemet më të mëdha që përballet jo vetëm Pogradeci, por krejt Shqipëria. Në 8 vite, shoqëria, kombi dhe vendi është në një rrokullisje në disa aspekte të paprecedentë. Sot jetojmë në monizëm të plotë. Nuk kemi kampe përqendrimi dhe burgje, por sot pushteti është i përqendruar në 1 dorë më shumë se pas shkurtit të vitit 1991. Studiuesit kanë nxjerrë se Rama sot ka 10% pushtet me shumë se Ramiz Alia. Ramiz Aliaj ishte një diktator, kishte predikuar idelogjinë më terroriste të kohës, atë staliniste. Ai e dinte që kishte kryer krime të rënda, por megjithatë ai nuk bëri një akt, që bëri Rama. Ai nuk tentoi të blejë opozitën. Nuk e donte opozitën. Edi Rama në mënyrë makabre arriti në një mënyrë që të dëmtojnë në mënyrë të tmerrshme opozitën dhe opozitarizmin.

Personalisht e kam pyetur veten: Çfarë po ndodh me ne? Cili është shkaku më themelor i këtij largimi masiv të shqiptarëve nga Shqipëria. I kësaj shpërbërje. Cili është shkaku që sot pasuritë publike të këtij vendi, janë shndërruar në mallkim kombëtar, njëlloj si dikur në vendet koloniale. Angola, është vendi më i pasur në botë në çdo gjë, diamante, naftë e çdo gjë. Ne, Angola dhe Uganda në vitin 1992, ishim në 3 vendet më të varfra në botë. Ne kishim pasur një diktakturë, ndërsa ata kishin qenë një koloni.

Sot pasuria jonë kombëtare është një mallkim në çdo lloj aspekti. Në të gjitha fushat. Ishte një fitore e jona, kur ne në vitin 2013, u bëmë eksportues qumështi. Por çfarë ka ndodhur tani? Një therje masive e lopëve të rracës. Pse? Sepse politika ka rritur çmimin dengut të barit, aq sa nuk e nxjerr me qumësht ai blegtori. Janë therur, 670 mijë krerë, 130 mijë lopë dhe të tjerat të imta e me radhë. Sot ne jemi importues të qumështit pluhur. Sot ke në zonën e ullirit me qindra e mijëra ton vaj të pashitur. Pasuria u është kthyer në mallkim,” tha Sali Berisha para intelektualëve të Pogradecit duke u shtuar se kolonën vertebrale shtetit shqiptar i ka prerë Reforma Soros në drejtësi.

“Amnistia është vrastare për konkurrencën. Dil ti e bëj para atje në krim dhe silli këtu dhe më falimenton mua. Pra një shtet që është kthyer në një makineri të tmerrshme vjedhje të qytetarëve. Makineri e tmerrshme mashtrimi, shkatërrimi. Ju folët për drejtësinë. Kur nisi reforma e kam mbështetur me të gjithë forcën time, sepse nuk ka gjë më të mirë se një drejtësi funksionale dhe të pavarur në një vend.

Çfarë pashë unë? George Soros kishte vetëm një projekt; ta shndërronte drejtësinë në një degë të ekzekutivit. Unë e dija, sepse e njoh shumë mirë Sorosin, më mirë se kushdo ndoshta. Nuk mund të mos kërkoja shpalljen e tij ‘non grata’. Kjo reformë i ka prerë shtetit shqiptar kolonën vertebrale,” tha Kryetari i PD ndërsa për hartën gjyqësore shtoi se është një ‘colpo di gracia’ tjetër mbi të drejtat e qytetarëve shqiptarë në kundërshtim me ligjin, për të cilën u zotua se do ta anulojë:

“Hartën e re gjyqësore ne do ta anulojmë menjëherë sapo të vijmë në pushtet. Kjo hartë është antiligjore, është në kundërshtim me ligjin që përcakton se gjykata duhet të jetë në distancën më të afërt të mundshme për qytetarët. Ky i vendos drynin gjykatave, në mënyrë që qytetarët të kenë sa më pak mundësi të ju drejtohen gjykatave. Ua këta zotëritë atyre që vijnë, ua paguan paratë George Soros, shqiptarëve? Asnjë qindarkë.

“Shqiptarët kanë humbur falë kësaj reforme që të kenë një proces të drejtë. Ligji ndërkombëtar thotë, jo vetëm proces transparent, por edhe në kohë. Sepse ai qytetar që nuk e merr drejtësinë në kohë, rrethanat mund të ndryshojnë, ai mund të vdesë dhe e merr në varr padrejtësinë që i është bërë.

Sot kanë 106 mijë dosje që presin 20 vite. Nuk ka më të drejtë reale për qytetarët e këtij vendi, falë reformës së Soros, i cili është promovuesi kryesor mbi tokë i ekstremit të majtë dhe kjo është e vërteta. Po bëhet gjithnjë e më e qartë në SHBA kjo gjë. Shqipëria u shndërrua në kavjen e Sorosit,” tha Berisha ndërsa këtë e ndërlidhi edhe me faktin pse Rama flet vetëm për kanabisin, sepse Soros është promotor i ndalimit të luftës ndaj drogës.

“A e keni dëgjuar Ramën? Më shumë se për çdo kulturë bujqësore, ai flet për kanabisin. Nuk flet për vreshta, mollë, fiq, apo ullinj, por kanabis. Promotor kryesor i ndalimit të luftës kundër drogës në botë, është George Soros. Ndërmerr nisma me presidentët e narko-shteteve të Amerikës latine, për të ndaluar luftën ndaj drogës. Këtu ai ka Edi Ramën.

Në këtë bashkëbisedim me intelektualët e Pogradecit, Sali Berisha e tha qartë se kjo nuk është një betejë për pushtet, por për shpëtim kombëtar.

“Do ta mbyll me pyetjen që shtrova në fillim: Pse ky shpopullim. Në veten time unë kam vetëm një përgjigje: dhunimi i votës. Vrasës kryesor i shpresës është dhunimi i votës. Nga viti 2007 në vitin 2014, popullata u rrit në Shqipëri, nga viti në vit. Edhe kjo është statistikë e kësaj qeverie. Nga viti 2014 deri më sot, 744 mijë qytetarë shqiptarë kanë ikur vetëm në hapësirën e BE-së. Sepse s’ka votë. Është zhvlerësuar vota, s’ka shpresë. Për një njeri që është qenie politike.

Shpresa e vetme për të ndryshuar gjërat në mënyrë paqësore është vota. Dhe ky ka demonstruar në mënyrë të hapur dhe krenarisht se ky nuk pyet për votën. Ka shndërruar shtetin në një makineri lubi të shkatërrimit të votës. Krijoi shtetin elektoral. Krijoi sistemin e patronazhistëve dhe mburret me krenari. E mbaj mend këtë sistem, është sistemin terrorist. E merrnin tjetrin atje në pallat dhe tre muaj para zgjedhjeve i bënin proces. Ku ja bënin procesin. Në oborrin e pallatit, që ta dëgjonin të gjithë të tjerët. Se ky Dhori, ishte një mekanik, nuk do të votojë, sepse do të na votojë kundër. Dhori u thoshte se nuk do të tregoj se si do të votoj, sepse ai kishte bërë burg. Halli ishte që të terrorizonin pallatin.

Kjo ka shkatërruar votën. Në këtë kontekst, ky nuk pranon në asnjë mënyrë votën e lirë. Ky është një armik i egër i lirive tona. Ne duhet të përgatitemi ti japim përgjigjen në mënyrën më të merituar. Intelektualët kanë një rol për të ndriçuar mendjet e të tjerëve. Kjo nuk është një betejë për pushtet, por për shpëtim kombëtar. A mund të zhvillohemi ne pa votë? Jo, nuk zhvillohemi dot pa votë. Historia e ka provuar. Ne nuk kishim votë dhe erdhëm në vitin 1990 në atë gjendje, dhe tani kemi humbu votën. Do ta rikthejmë votën, por me këtë nuk kemi votë. Duhet ta rrëzojmë këtë, që të votojmë si qytetarë të lirë, dhe shqiptarët ti zgjedhin qeveritarët me vullnetin e tyre të lirë.”

Me këtë rast Berisha tha se funksionimi i shtetit ligjor do të jetë themeli i programit të ardhshëm qeverisës të Partisë Demokratike.

“Shqetësimet, mendimet do të jenë pjesë integrale e programit të ardhshëm. Nga do ta fillojmë? E ke pyetjen më të drejtë. Ligji, ligji dhe vetëm ligji. Do e fillojmë me funksionimin e shtetit ligjor. Ligji është bërë në radhë të parë që të funksionojë tregu. Njeri e bëri ligjin në mënyrë që të garantonte funksionimin e tregut.

Për të garantuar liritë dhe të drejtat e tij. Ne do e fillojmë nga ligji. Kemi program ekonomik që do ta rishqyrtojmë dhe do të marrim specialistët më të mirë shqiptar, këtu dhe në botë. Do të krijojmë një ekip ekonomik që do të japë përgjigjet më të shkëlqyera problemeve të mëdha të krijuara deri më sot në fushën e ekonomisë. Por vendosja e ligjit, lufta me zero tolerancë kundër krimit dhe korrupsionit, duhet të jenë dy motivet tona kryesore mbi të cilat unë kam besimin më të madh se Shqipëria do të shërohet nga këto plagë të rënda që ka sot.”

Ndryshe, para bashkëbisedimit me intelktualët, Kryetari i Partisë Demokratike, Sali Berisha, zhvilloi një takim me Kryesinë e PD Dega Pogradec ku u shpreh se çdo shqiptar ka mision rrëzimin e qeverisë së Edi Ramës i cili ka vrarë votën e lirë.

“Pushteti i Ramës i përqendruar sot 10 për qind më shumë se sa në 91-shin tek Ramiz Alia, është një pushtet i rrezikshëm i cili ka shndërruar makinerinë shtetërore në një makineri gjigande mashtrimi për qytetarët. Plaçkitje e grabitje ndaj qytetarëve,” tha Sali Berisha pas këtij takimi duke përfunduar:

“Demokratët janë para një misioni historik edhe më të rëndësishëm se në 91-shin për të shpëtuar Shqipërinë nga ky regjim monist i një njeriu që e ka shpallur veten armik i egër i votës së lirë.”