Liria e pishinës!
nga Agim Popoci
Një shtet që qeveriset nga Edi Rama s’ka se si të jetë ndryshe, liri ka pishina dhe jo shtypi, ashtu siç ka pushtet të katërt pronari i një medie dhe jo media!
Në dukje mund të krijohet ideja se është paksa e ngatërruar, por nuk është aspak ashtu!
Liria e shtypit rezulton se nuk u cenua kur Irfani ndërpreu lëvizjen e qytetarëve në bregdetin shqiptar, aty ku ai deshi të ndërtoj pishina, pavarësisht se ishin në plazh publik, sepse linja editoriale e medies së tij ishte e pëlqyeshme nga burimi i financave të Irfanit që nga ditët kur Edi Rama ishte kryetar i bashkisë Tiranë.
Kjo nuk u tha as nga Irfan Hysenbelliu që mediat e tij ndër të tjera i kishte edhe si gjyle për gjuajtjen e vandalëve të lirisë së pishinës, as nga Edi Rama i cili pishinën nuk e gjeti dhe e inkurajoj Irfanin ta sjellë në mesin tonë!
Këtu Irfani u keqkuptua, e ngatëroi veten me Lali Erin dhe ndërtoi pishinat mu në mes të rërës. Pak tokë majtas e ca djathtas, i dha kuptim Resortit i cili do të kontribuoi edhe për Ballkanin e Hapur duke pritur turistë serbë.
Por, papritmas, kur ende nuk dihej nëse sezoni turistik do zgjas edhe gjatë muajit shtator, ia behu pandehur Edi Rama me fadromat e tij. Po, po, Edi Rama me po ato fadroma që shembi mijëra shtëpi e biznese, dhe media e Irfanit u përdor vetëm si përçues i mesazheve se ky është Kryeministri që shemb godina pa leje. Me policë ndër shalë IKMT filloi të cenoi lirinë e pishinave por tani pa i dhënë urdhër Irfanit që këtë spektakël ta përdor si mesazh për të gjithë ata horra që nuk po i binden urdhrit të Edi Ramës që të largohen nga bregdeti shqiptar, aty ku kishin krijuar idenë se kanë paguar lejen për ndërtim dhe miqësinë me Kryeministrin!
Irfani vendosi për komunikim ndryshe me Kryeministrin, dhe me llogari të gabuara u fut në aventurën përballë Edi Ramës ashtu siç bëjnë mediat me kompanitë e mëdha celulare dhe ato të karburanteve kur nuk japin reklama.
Me mediat e tij ndër sqetull tregoi fadromat mbi pishina dhe u tha shqiptarëve se liria e mediave ishte cenuar; Ndërsa me analistët e tij me të cilët “zbardhi” 21 Janarin e Saliut dhe solli Edi Ramën në pushtet, iu drejtua opinionit publik për ta bindur se sot Edi Rama është vandali, dhe po cenon lirinë e mediave.
U shkëmbyen harta dhe vendime ndër palët pranë pishinave me liri të cenuar, u krijua një amulli edhe ndër socialistë “ç’ne Irfani po zihet me Edi Ramën”, por miletit iu tha se të gjithë ishin fajtorë përveç Irfanit; Madje edhe talebanët që na bënë të besojmë në mëshirën e Edi Ramës duke pritur afganë tek Resorti i Irfanit!
Por, për t’u qartësuar kjo shoqëri, mungoi dhe një hallkë thelbësore për të cilën ka kohë që vuajnë shqiptarët dhe nuk e bëjnë dot shoqërinë demokratike, opozita!
Kur e kuptuan se Taulant Balla u spostua nga karrigia e Irfanit, të gjithë u vunë në rresht për tu ulur në atë fron, i cili zinte vend në ekranin e Irfanit edhe kur shfaqej lideri opozitës Lulzim Basha në publik. Pa kërkuar leje por me servilizëm, deputetët e opozitës u vunë në rresht për ti treguar opinionit publik se sa është shkelur liria e mediave duke harruar se pronari i saj nuk kishte dhe nuk do të ketë kurrë, kurrfarë lidhje as me të djathtën, as me PD-në e aq më pak me lirinë e medias.
Shqiptarët panë deputetët e opozitës që kërkojnë dekomunistizimin por nuk shqetësohen me mediat e Irfanit që propagandojnë komunizmin dhe Enver Hoxhën ama nuk rrinë kot kur pronari i kësaj medie divorcohet nga Taulant Balla.
Shqiptarët panë deputetët e opozitës duke i kujtuar Edi Ramës se ishte Irfani ai i cili strehoi afganët por nuk ishin dëgjuar ti kujtojnë Kryeministrit se ky njeri kishte mohuar lirinë e lëvizjes së qytetarëve në bregdetin shqiptar!
Shqiptarët panë dhe medien e Irfanit deri në neveri që sulmon për ditë të të tëra Edi Ramën pse i rrënon dy pishina dhe hapësirën që kishte zënë në plazhin e Golemit, dhe zgjohet të premten e 8 shtatorit për të tu informuar po nga këto media se sa Qeveri të mirë kemi me në krye Edi Ramën pasi hapi thesin për të përballuar krizën.
Meqë nuk ka një organizatë, “Pishinat pa kufi”, me raportin e të cilës do të ekzaltoheshin këta deputetë opozitarë pa një pikë ndërgjegje, duke u krekosur me cenimin që Edi Rama i ka bërë pishinave të Irfanit, shqiptarët, duke vazhduar të jetojnë në vendin e shqipeve pa përgjigje mbi lidhshmërinë e lirisë së pishinave të servilit të Kryeministrit me lirinë e mediave që nuk e gëzuan kurrë kur qeverisën komunistët, ambientohen duke shqipëruar dhe postulatet që vlejnë në gjithë botën:
Liri e pishinës mbaron aty ku fillon liria e tjetrit!
