ECB rrit në mënyrë të paprecedentë normat e interesit për të luftuar inflacionin

Banka Qendrore Europiane, ECB, njoftoi sot një rritje të paprecedentë të normës bazë të interesit, me 0.75 pikë përqindje dhe sinjalizoi rritje të mëtejshme. Banka po i jep përparësi luftës kundër inflacionit edhe pse ekonomia e bllokut po shkon drejt një recesioni të mundshëm dimëror, shkruan Reuters.

Me inflacionin që ka arritur në nivelin më të lartë në gjysmë shekulli dhe që i afrohet territorit dyshifror, politikëbërësit janë të shqetësuar se rritja e shpejtë e çmimeve mund të vazhdojë, duke zhvlerësuar vlerën e kursimeve të familjeve.

Në vijim të rritjes së normës së saj në korrik, ECB rriti normën e saj të depozitave në 0.75% nga zero dhe rriti normën e saj kryesore të rifinancimit në 1.25%, nivelet e tyre më të larta që nga viti 2011. Banka parashikon rritje të mëtejshme në tetor dhe dhjetor.

“Presionet e çmimeve kanë vazhduar të forcohen dhe zgjerohen në të gjithë ekonominë dhe inflacioni mund të rritet më tej në afatin e afërt”, tha ECB në një deklaratë.

“Ky hap i madh shënon kalimin nga politika akomoduese drejt niveleve më agresive, që do të sigurojnë kthimin në kohë të inflacionit në objektivin afatmesëm prej 2% të ECB-së”, shtoi ECB.

Politikëbërësit po debatonin për javë të tëra midis një rritjeje prej 50 dhe 75 pikësh bazë, por rritja e vazhdueshme si në inflacionin total ashtu edhe në atë bazë duket se e ka zgjidhur debatin, pasi shifrat tregojnë se shtrenjtimi i çmimeve tani po depërton në ekonominë më të gjerë, duke e bërë edhe më të vështirë luftimin e tij.

ECB rishikoi sërish në rritje projeksione për inflacionin, duke e çuar në 5.5% për vitin nga 3.5%, që ishte më parë dhe për vitin 2024 në 2.3%, mbi objektivin e saj prej 2%.

Tregjet ishin pak të befasuara, megjithatë, pasi investitorët kishin vlerësuar tashmë një probabilitet prej më shumë se 80% të një lëvizjeje me 75 pikë bazë, edhe pse ekonomistët e anketuar nga Reuters ishin më të ndarë, duke treguar se vetëm një shumicë e vogël priste një lëvizje më të madhe.

Pavarësisht rritjes së lartë, ka të ngjarë rritje të mëtejshme të normës, tha BQE.

“Gjatë disa takimeve të ardhshme, Këshilli Drejtues pret të rrisë më tej normat e interesit për të ulur kërkesën dhe për t’u mbrojtur kundër rrezikut të një zhvendosjeje të vazhdueshme për lart të pritjeve të inflacionit,” shtoi BQE./Monitor/