Edhe një vdekje e dyshimt në Rusi? Koloneli i Putinit u gjet i varur

Edhe një vdekje e dyshimt raportohet në Rusi. Koloneli Roman Malik, i ngarkuar me rekrutimin e ushtarëve dhe dërgimin e tyre në Ukrainë, është gjetur i varur në fundjavë. Ndonëse fillimisht u tha se shkaku i vdekjes ishte problemi me zemrën, policia nuk ka përjashtuar mundësinë e vrasjes ose vetëvrasjes, shkruan e përditshmja britanike Times.

Pas urdhërit për pushtimin e Ukrainës nga Presidenti i Rusisë, Vladimir Putin, janë shënuar disa vdekje të dyshimta të rusëve të pasur.

Kështu, njeriu i Putinit për zhvillimin e burimeve arktike ruse, Ivan Peçorin, u tha se është rrëzuar deri sa po lundronte në bregdetin e Paqësorit. Ai ishte Drejtori i Përgjithshëm i Korporatës së Putinit për zhvillimin e Lindjes së Largët në Arktik.

Ish-Zyrtari i lartë i Institutit të aviacionit të Moskës, Anatolij Gerashçenko, u tha se ka rrëshqitur në shkallë në godinën e institutit dhe ka vdekur si pasojë e plagëve të marra.

Kryeredaktori i medias shtetërore ruse Pravda, Vladimir Nikolajeviç Sungorkin, u tha se ka vdekë nga ataku në zemër, e Daily Mail raporton se Sungorkin kishte shenja të mbytjes.

Presidenti i Këshillit Drejtues të prodhuesit rus të naftës Lukoil, Ravil Maganov, në fillim të muajit shtator humbi jetën pasi u tha se u hodhë nga dritarja e spitalit në Moskë. Maganov ka punuar në këtë kompani nafte nga viti 1993, e vëllau i tij ishte njeriu kryesor i prodhuesit tjetër të naftës Tatnjefta.

Milioneri rus, Jurij Voronov, i cili kishte lidhje me Gazpromin, në fillim të muajit korrik u gjet i vdekur në pishinën e vilës së tij në paralagjen luksoze të Sankt Peterburgut. Trupi i tij i pajetë u gjet në pishinë ndërsa kishte një plagë me armë zjarri në mes të ballit, dhe në fund të pishinës u gjetën gëzhojat.

Ish-Drejtori ekzektuiv i Lukoil, Aleksandar Subotin, më 10 maj u gjet i vdekur në shtëpi ndërsa filluan hetimet edhe pse u tha se pësoi atak kardiak.

Ish-Zv/Presidenti i Gazprombank, Vladislav Avajev, më 18 prill u gjet i vdekur në banesën e tij në Moskë me një plagë nga arma e zjarrit, së bashku me bashkëshorten dhe vajzën 13-vjeçare. Hetuesit thanë se ai qëlloi bashkëshorten dhe vajzën para se ta vriste veten.

Miliarderi rus, Vasilij Melnikov, në marsin e këtij viti u gjet i vdekur në banesën e tijë. Sipas mediave ruse, ai, bashkëshortja dhe dy djemtë të moshës 4 dhe 10 vjeç, ishin therur me thikë.

Drejtori ekzekutiv i Gazprom, Aleksandar Tjulakov, më 25 shkurt u gjet i vdekur në garazhin e tij afër Sankt Peterburgut. Policia tha se pranë trupit të tij të pajetë u gjet një mesazh mbi vetëvrasjen. Mediat ruse raportuan se Tjulakov ishte rrahur keq para vdekjes.

Edhe një Drejtor ekzekutiv i Gazprom, Leonid Shulman, në shkurtin e këtij viti u gjet i vdekur në vilën e tij, një muaj para pushtimit rus. Në mesazhin lamtumirës e cila u gjet në afërsi të trupit të pajetë shkruanet se ai nuk dëshiron të bëhet invalid dhe barrë për familjen e tij.