Tensione në protestën e artistëve/ Maks Velo flet për mbrojtje demokratike dhe fyen …

Maks Velo, ishte një nga folësit në protestën e organizuar prej muajsh në mbrojtje të Teatrit Kombëtar.

Ndonëse shprehu kritika të forta ndaj qeverisë, veçanërisht për mospublikimin e projektit, Velo tha se mbrojtja e Teatrit do të bëhet në mënyrë demokratike dhe jo me luftë.

Madje Velo nuk ka nguruar që njërin nga parafolësit ta quaj palaço, pasi ai tha se Teatri duhet të mbrohet me çdo çmim.

Velo ka thënë se qëllimi nuk është dhe nuk duhet të jetë që të shkojmë në luftë, siç duan disa, sipas tij, por teatri duhet dhe do të mbrohet në mënyrë paqësore.

Velo ndërsa ka shtruar pyetjen se pse nuk është bërë publik projekti për teatrin në parlament, shtoi se kjo nuk bëhet sepse ai projekt është katastrofë.

“Mos na fusni në kanale të tjera siç duan të na fusin disa, ne nuk bëjme luftë. Ne do ta mbrojmë teatrin në mënyrë demokratike, por jo me luftë. Pse nuk sjellin projektin? Pse nuk e treguan në Parlament? Se është një katastrofë. Ata e dinë këtë”, tha Velo.

Pas Velos ka reaguar, Ervin Goci, i cili i drejtohet Maks Velos: “Të respektojmë njeri-tjetrin, mos të anatemojmë njëri-tjetrin. E kuptoj shumë mirë ç’thotë zoti Velo, po kemi 5 muaj me këtë situatë, është takuar kryeparlamentari Ruçi, Presidenti Meta…. s’ka mbetur askush për tu takuar. Dhe përgjigjet kanë qenë 0, na thonë: ikni vdisni se merremi ne me këtë punë”.