Edi Rama, frikë nga 21 Janari!
nga Basir Çollaku
Edi Rama nuk e do hetimin e 21 janarit 2011, protestës kryesuar prej tij, ku përplasja solli pasojë ekstreme tragjike, katër qytetarë protestues të vrarë. Madje është njeriu më i interesuar për moshetim. Mundet të jetë njëherësh, kontribuesi i rëndësishëm për ta fjetur e lënë shpërndarë viteve.
Kryeministri Rama, prej shumë vitesh kontrollon dhunshëm çdo pushtet. Përfshirë këtu edhe Drejtësinë, të cilën sot e kontrollon më tepër se Qeverinë.
Provat e këtij fakti janë publike.
E mbajti Sajmir Tahirin aq sa deshi jashtë qelie dhe hetimi. Sulmoi pacipësisht oficerin e antidrogës denoncues Dritan Zagani dhe oficerin italian të Guardias A. Giuiliani, ndonëse antimafia italiane u dha të drejtë oficerëve.
E manipuloi hetimin për vëllanë e Fatmir Xhafës aq sa deshi dhe si deshi, duke bërtitur publikisht se zërin e Agron Geron Xhafës e njihte më mirë ai se ekspertët.
Ulërinte për qelibarllekun e Elvis Rroshit, më pas i larguar nga dekriminalizimi, sot sërish në hetim përballë Prokurorisë së Posaçme.
E kontrolloi dhe trukoi hetimin për Taulant Ballën, Rrahaman Rrajën, Artur Bushin, në ngjarjen e Postës së Policisë së Fushe Krujës, kur oficerit të policisë, Emiljano Nuhu, iu vu pistoleta nga banditët në zyren e tij në prani të emrave të mësipërm.
E mban varur dhe e gradon Ilir Beqen dosja e të cilit në SPAK sot dhe Krimet e Rënda dje është me metër kub.
E quan Vangjush Dakon akullore, sapo shpallur non grata nga USA për afera të mëdha korrupsioni, madje bëri kurban ish-ministrin Xhafa kur u përpoq të arrestonte Dakon.
E mbron verbërisht edhe nga frika Arben Ahmetajn, sepse ne vallen e inceneratorëve, rindërtimeve, ish ministri e merr me vete bashkë me Agaçin, Subashin, Sakon, Gjiknurin, dhe Veliajn në superdosjen gjysëm miliardë euro të inceneratorëve.
Ministrin Lefter Koka e dërgoi në qeli pasi e ftoi bashke me ish-ministrin Naço ti jepnin një dorë elektorale ne 2021. Dhe ai mbetet ne burg ku as e pyesin nga frika mos deshmia hap kapitull vrasës për të pandehur të munguar brenda qeverisë.
Alqi Bllakon deputetin e tij e la të largohej, ndaloi policinë të zbatonte urdhërin e SPAK, pastaj e ktheu për të arnuar dosjen rrugës.
Kryebashkiakun e Tiranës me së paku dy dosje për Mafian, ku i del emri dukshëm në SPAK, e rikandidon për ta larguar nga qelia. Struket dhe tulat njëherësh Prokurorinë Speciale, pasi i vëllai Olsi Rama, gjendet në ortakëri me Amant Josifin, organizatën e akuzuar nga partnerët italianë, spanjollë, belge, gjermanë, për mashtrime mbi 2.4 miliardë dollarë, shifër më e madhe se piramidat e zeza të 97-ës.
Mbron me çdo marifet force Xhaçkën strategjike sepse i duhet për qokën katastrofike të detit dhe mjaft zullume te tjera të mëdha. Belindën sërish e sajdis me garanci nos-hetimi, ndonëse masakrat financiare në investime rrugësh, energji, KESH, OSHE, OST, janë puseta thithëse të parasë publike. Aty janë edhe Benet Beci kandidati i Shkodrës dhe Ardian Çela pretendent për kandidat në Durrës.
Për të dy mirë është të flasë Prokuroria ku gjenden me hetimet. Se shefja e kabintetit të Çelës kthyer me dorëzim të kontrolluar në qeli, bitisi qindra mijë euro tenderash, për të cilat nuk paska pasur dijeni titullari!!!?
Kilometrat e rrugëve 20 milionë eurosh, më parë nga Damiani e tani nga Balluku, apo Porti Durrësit miliarda dollarë ku shitet ajri e Prokuroria bën sehir, janë shtesa të pafundme marrëzie.
E largoi Ard Veliun si drejtues policie kur u bënë shkeljet mullar pastaj e ktheu mbikqyrës të saj, pasi kishte larguar edhe drejtorin 10 mujor të policisë Gledis Nano, sepss nje kasetë fort delikate dëshmitari, pati përfundim diplomatik dhe nuk ra në duart e tij.
Për t’iu rikthyer datës se dashurisë mbi hipokrizinë të Ramës. Po. Një nga fëmijët e viktimave të 21 janarit a punon në Kryeministri dhe çfarë përgjigje i jep Rama për vrasjen e babait?!?! Ai mund të jetë fakt i ri hetimor. Mbase…
Sekretet e Ramës mund të jenë frikërat e Ramës dhe për të mbrojtur veten, ortakët e tij në krimet e ndodhura, ai, Edi Rama, është gati të vrasë çdo institucion.
Përfshirë edhe pjesë të opozitës!
