Me Kurtin, shqiptarë e boshnjakë në Serbi kërkojnë reciprocitet me të drejtat e serbëve në Kosovë
Reciprocitet të të drejtave me serbët në Kosovë kërkuan sot përfaqësues politikë të komuniteti boshnjak e shqiptar që jetojnë në Serbi në takim me Kryeministri Albin Kurti.
Nga delegacioni i SDA Shanxhak që kryesohej nga kryetari Sulejman Ugljanin, i shoqëruar nga kryetari i PVD, Shaip Kamberi, dhe dy deputetët tjerë në Kuvendin e Serbisë, Enis Imamovic dhe Selma Kucevic, kryeministri Kurti u njoftua për brengat dhe problemet me të cilat ata ballafaqohen.
Me përfaqësuesit boshnjakë dhe shqiptarë u diskutua edhe për elementet përbërëse të propozimit evropian për normalizim të raporteve ndërmjet Kosovës dhe Serbisë.
“Të drejtat e komuniteteve joshumicë në shtetet tona pasqyrojnë demokracinë dhe zhvillimin tonë si shoqëri. Për dallim nga Serbia që nga Freedom House klasifikohet si shtet me regjim hibrid, Republika e Kosovës është shtet demokratik me të drejta dhe liri për të gjithë,” tha Kryeministri Kurti duke shtuar se komunitetet e ndryshme pa dallim duhet të trajtohen në kuadër të principeve universale e në harmoni të plotë me standardet e Bashkimit Evropian.
Tre deputetët në Kuvendin e Serbisë që pranojnë Kosovën e pavarur, Enis Imamovic, Selma Kucevic dhe Shaip Kamberi, së bashku me Sulejman Ugljanin, theksuan se janë të pakënaqur me statusin e boshnjakëve dhe shqiptarëve në përgjithësi e posaçërisht në komunat e Novi Pazarit, Tutinit e Sjenicës në Sanxhak si dhe të Preshevës, Medvegjës e Bujanocit në Luginë.
Ata kërkuan reciprocitet të të drejtave me serbët në Republikën e Kosovës.
U pajtuan se për paqe të qëndrueshme dhe siguri në Ballkanin Perëndimor duhet të ketë simetri të drejtash, dhe jo qasje privilegjuese ndaj një pakice apo komuniteti.
Në takimin i cili u zhvillua sot në Prishtinë me përfaqësuesit politikë të komuniteti boshnjak e shqiptar që jetojnë në Serbi, Kryeministri Albin Kurti, ishte i shoqëruar nga ministri i Kulturës, Rinisë dhe Sportit, Hajrulla Çeku dhe Këshilltarja Politike, Ardita Sinani.
