Edi Rama, porositës i vrasjes së opozitës, Berisha: Largohet vetëm me revolucion!

Duke e cilësuar Kryeministrin Edi Rama si porositës të vrasjes së opozitës, Kryetari i Partisë Demokratike, Sali Berisha, sot ishte i prerë para Kryesisë së PD duke theksuar se ai largohet vetëm me revolucion.

Në mbledhjen e Kryesisë që, siç tha Kryetari i PD e kishte mbledhur për të përcaktuar detyra më konkrete për të vazhduar betejën në të gjitha planet dhe jo vetëm në Parlmament, ku dhe paralajmëroi intensifikim të rezistencës në parlament me zotimin final: Parlamentin nuk e dorëzojmë!

“McGonigal, që vazhdon të jetë kryefjalë e medieve botërore, është në burg, kurse porositësi i vrasjes me pagesë të opozitës shqiptare, është në pushtet.

Cilido që mendon se ky porositës i krimit më të shëmtuar ndaj demokracisë dhe pluralizmit, asgjësimit të pluralizmit de facto, largohet me votën e lirë, gabon. Është iluziv, gënjen veten. Kjo është e vërteta.
Ky porositës i vrasjes së opozitës largohet vetëm me revolucion.

Sepse, Shqipëria, një vend anëtar i NATO-s, ka degraduar në shkallën më ekstreme. Në Europë është narkoshteti i parë dhe i vetëm. Do të thotë se vendos mafia e drogës.

Shqipëria është vendi i qytetarëve, që vidhen në mënyrën më monstruoze. 4.5 milionë euro po ndërtohet autostrada Kakavijë-Janinë, 22 milionë euro po ndërtohet autostrada Limuth-Rrogozhinë. A munden shqiptarët të pranojnë një gjë të tillë?

Marrim vetëm këto krahasime.

Kurse rrugët anësore të autostradës Lekaj-Tepelenë shkojnë 7.1 milionë dollarë për kilometër. 320 milionë së bashku,” tha Sali berisha duke shtuar se askush nuk duhet të ketë iluzione se McGonigal ishte person i izoluar

“Fati i këtij revolucioni varet nga komunikimi ynë intensiv me qytetarët, jo nëpërmjet ekraneve. Do i përdorim ekranet, por kontaktet direkte janë rruga absolute e suksesit të revolucionit.

Për ne ishte një ndihmë e jashtëzakonshme arrestimi i McGonigal me akuzat dhe qartësimin se ai komplotoi kundër pluralizmit në Shqipëri.

Por, siç e thoshte Washington Examiner, zyrtarë, në shumës, askush nuk duhet të ketë iluzione se McGonigal ishte person i izoluar.

Dhe në këtë periudhë, ata që vazhduan veprën e McGonigal, me non-grata, me sulmet e paimagjinueshme ndaj PD, një forcë që përpiqej të mbronte vlerat perëndimore në këtë vend, po përpiqej të mbronte shtetin ligjor, po denonconte me gjithë forcat e veta. Por ajo nuk duhej të ekzistonte për këtë mafie të rrezikshme. Duhej të ekzistonte vetëm Edi Rama, që shpërndante para me valixhe dhe ushqente këto shushunja. Dhe që shfrytëzonin pushtetin e vendeve të tyre kundër opozitës në një rast unik.

Kemi lexuar për grushte shteti për rrëzim qeverie, por grusht shteti për rrezik opozite ndoshta ka ndodhur, por nuk kam lexuar ndonjëherë, ” tha Berisha duke akuzuar ata që shndërruan Shqipërinë në narkoshtet.

“Ne na duhet një dialog shumë intensiv. Sepse ky grup jo vetëm ndërmori aktet më të turpshme dhe kriminale ndaj opozitës dhe pluralizmit, por ky grup i siguroi kësaj organizate kriminale mbrojtjen më të fuqishme ndërkombëtare, evidente.

Nuk duhet të harrojmë qëllimet më kryesore, se si shkohej dhe urohej për zgjedhje në natën e zgjedhjeve, dhe përsëri të nesërmen në kundërshtim me kodin, që thotë uro fitoren, por të presim shqyrtimin e ankesave. Është një standard që e dha ambasadori i SHBA në OSBE në Vjenë.

Por këtë nuk e dha Juri Kim, nuk e tha Metju Palmer. Prisnin me padurim fitoren e Edi Ramës.

Me çfarë meritash? Se e shndërroi Shqipërinë në narkoshtet? Që nxori të dhënat private të qytetarëve dhe ia dha partisë së tij?

A ishin të paguar nga Edi Rama apo jo, nuk e di, por realiteti është ky dhe ne duhet ta themi në sy realitetin çdo shqiptari, u luajt me fatet e tyre. Askush nuk e përcakton fatin më shumë se vota.

Ky qëndrim u mbajt vetëm për të shtypur opozitën shqiptare dhe për të ndihmuar një regjim kleptokratik, një narkoregjim.

Ndaj e konsideroj jetik këtë dialog, shtëpi më shtëpi, derë më derë, me çdo qytetar, pavarësisht bindjeve të tij politike.”

Me këtë rast lideri i opozitës u shprehë qartë se dhuna nuk të sjell në objektivin që kërkon dhe PD është në hapat më fillestarë të mosbindjes civile.

“Ju e shihni, gazeta më e madhe në SHBA, Washington Post thotë që Edi Rama është i zhytur deri në fyt në afera sekrete me McGonigal.

Ju e dëgjuat gazetarin e BILD nga New Yorku, deklaroi haptas se dokumentet faktojnë se McGonigal u mor me Sali Berishën.

Ndaj dhe duhet të vazhdojmë me persistencë absolute këtë revolucion. Në mënyrë kreative.

Unë e di që çdo ditë do dëgjoni njerëz që ju thonë se pa dhunë, nuk përmbyset, nuk arrihet.

Unë u them atyre, dhe ju do u thoni, se qëndresa është forcë. Dhuna nuk të sjell në objektivat që kërkon.

Ne jemi në hapat më fillestarë të mosbindjes civile, të shfrytëzimit të potencialit të jashtëzakonshëm që ka mosbindja civile. Nuk shkojmë te forca. Sepse të shkosh te forca, do të thotë të marrësh pushtetin me forcë. Që në këtë moment, kjo forcë asgjëson veten.

Por përdorim çdo formë të mosbindjes civile,” tha Berisha ndërsa kishte një mesazh për atë grusht të zhveshur nga çdo moral politik, që e trajtojnë parlamentin si një klub të neveritshëm:

“Ju e shihni se si sillen në parlament. Kurrë parlamenti Linda-Rama nuk ka qenë në këtë situatë. Kurrë!

Një grusht të zhveshur nga çdo moral politik, e trajtojnë parlamentin si një klub të neveritshëm, si një plaçkë të neveritshme.

Bënë dje deklaratë që të më akuzonin mua si fajtor për sjelljet e shfrenuara të të tjerëve. Apo fajin e ka saliu edhe këtu? Kjo ishte kulmore. Ja ku shkon degradimi.

Duhet ta dini se aty nuk ishte vetëm Edi Rama, ishte edhe diçka tjetër.

Ndaj kërkoj tani që koalicioni PD-PS i grave që të faktonte se për shfrenimet e tyre, fajin e ka Berisha.
E dhashë këtë shembull për të thënë se shikoni se në çfarë shkalle, këta kanë humbur çdo lloj logjike.
Kanë humbur gjithçka dhe janë të aftë të thonë çdo gjë, të ndërmarrin çdo gjë.

Duhet të falenderojmë qytetarët për përgjegjësinë dhe pjesëmarrjen e tyre në protesta. Duhet të vazhdojmë,” tha kryedemokrati duke e bërë të qartë se PD nuk i bojkoton zgjedhjet, ndërsa për vendimin e gjykatës dhe ata që duan ta përjashtojnë, do përballen me Partinë Demokratike.

“Revolucioni ka një dimension tjetër, po kaq të rëndësishëm, po kaq jetik: dimensionin elektoral.
Sepse bëhet çdo gjë që të grabiten zgjedhjet, të plaçkiten zgjedhjet.

Ne duhet të qëndrojmë ndaj çdo akti, ndaj çdo veprimi, ndaj çdo përpjekje të shkelmimit të ligjit të zgjedhjeve.

Ne nuk i bojkotojmë zgjedhjet.

Përpjekja për të përjashtuar PD-në nga zgjedhjet është etapa e tretë e skenarit të të njëjtëve autorë. Por absolutisht do marrin përgjigjen e merituar.

Sepse çdo vendim, përveç vendimit që është marrë, është i paligjshëm. Nuk ka asgjë më të paligjshme se shpallja palë e atij që nuk është palë.

Ne kemi vendimin e gjykatës, ata që duan të na përjashtojnë ne, do përballen me ne. Kjo është e gjitha,” tha Kryetari i Partisë Demokratike para Kryesisë së PS se Parlamentin nuk e dorëzojnë.

“Demokratët nuk kanë ndërmend të tërhiqen nga zgjedhjet, as të dorëzohen. Ky është revolucion.
Unë e kuptoj se ky term ngjall debat. Por në rast se një vendi, me forca madhore, i shkatërrohet pluralizmi, si mund ta rivendosë ai?

Ai është një akt kundërrevolucionar, ky është revolucion. Ai është grusht shteti kundër pluralizmit.
Ne jemi në të drejtën tonë dhe ne i injorojmë këto. Marrim vetëm qëndrimet e parlamentit: a mund të veprohet në një parlament siç vepron Edi Rama me Lindën e tij kryetare?

Në mënyrën më të turpshme dhe të padenjë. Ndaj dhe ne rezistencën në parlament duhet ta shumëfishojmë. Nuk e dorëzojmë ne parlamentin. Nuk kemi autoritet për të dorëzuar parlamentin. Ne përfaqësojmë 750 mijë zgjedhës.

Kështu që thashë të bëjmë këtë mbledhje, të përcaktojmë detyra më konkrete dhe të vazhdojmë betejën në të gjitha planet,” tha Kryetari i Partisë Demokratike, Sali Berisha, duke e konsideruar jetik këtë revolucion për të çmontuar këtë regjim, dhe u zotua se PD do ta çmontojë.

“Beteja është në të gjitha fushat, por ne do ta fitojmë këtë betejë. Nuk ka humbur ndonjëherë revolucioni paqësor.

Revolucioni paqësor fiton, do durim.

Absolutisht fiton dhe fiton në mënyrë të sigurt.

Ky revolucion është jetik për të çmontuar këtë regjim dhe ne do e çmontojmë atë.”