Eksodi i mjekëve, Rama: Shteti shqiptar s’financon studime për sistemin shëndetësor gjerman!
Ikja e mjekëve dhe infermierëve jashtë vendit, kryesisht në Gjermani, ishte pjesë e fjalës së Kryeministrit Edi Rama në Kongresin e Parë të Shëndetësisë në Tiranë, ku vlerësoi se ka ardhur koha që të adresohen problematikat pasi taksapaguesit shqiptar nuk paguajnë për këto studime që mjekët të marrin diplomën dhe të ikin të shërbejnë në Gjermani, por për shëndetin e popullit shqiptar.
Pra, shtoi Rama, shteti shqiptar nuk financon studimet për sistemin shëndetësor gjerman, dhe nuk mjafton që të kryesh një shkollë dhe të kesh përmbushur detyrimet e tua në aspektin teorik, por duhet dhe aspekti praktik.
“E dimë se nga vijmë dhe se ku duhet të shkojmë, ndaj jemi të detyruar që të ecim para, sa i përket vendimmarrësve dhe politikbërjes, për furnizimin e këtij kapitali njerëzor. Ky kapital ka nevojë për investim, arsimimin, pagë dinjitoze. Nëse marrim arsimimin, mund të themi se kemi ecur në mënyrë pozitive para. Sot kemi një sistem arsimimi të bluzave të bardha, që e ka marrë vulën e cilësisë nga fakti se të arsimuarit në vendin tonë mirëpriten dhe në vendet e zhvilluara.
Sot jemi para një problemi që duhet ta adresojmë në mënyrë të ndershme. Arsyeja se pse shtetet investojnë për të bërë sa më të lehtë procesin e studimeve, është për të garantuar shëndetin e popullit të tyre. Në kushtet e sotme rezulton e pamundur që shteti shqiptar, taksapaguesi, mundësitë e të cilit nuk janë të pakufizuar, dhe shërbimet nuk vihen në diskutim, të paguajnë 15 nga 16 pjesë të financimit të studimit të një mjeku. Pra, sot studenti i mjekësisë paguan 1/16 e kostos reale,” tha Edi Rama duke shtuat se këtë shteti e bën duke marrë në konsideratë një sërë faktorësh që s’ka nevojë t’i rendis.
“Shteti nuk e bën dhe taksapaguesi shqiptar nuk paguajnë për këtë, që ditën kur mbarojnë studimet dhe marrin diplomën e mjekut, ata që financohen nga ky buxhet dhe kjo sakrificë, të ikin të shërbejnë në Gjermani. Shteti shqiptar nuk financon studimet për sistemin shëndetësor gjerman. Ky është problem që shumë vende e kanë adresuar dhe ka ardhur koha që dhe ne ta adresojmë. Nuk mjafton që të kryesh një shkollë dhe të kesh përmbushur detyrimet e tua në aspektin teorik, por duhet dhe aspekti praktik.”
Duke konstatuar përmirësimin e kushteve krahasuar me vite më parë, Kryeministri Rama si mjeshtër i premtimeve dha edhe një premtim të ri ndonëse ka 10 vjet që sundon këtë vend, se duke nisur nga 30 prilli, mjekët specialistë do të marrin 50 mijë lekë të reja plus mbi pagën e tyre.
“Sot kushtet e punës janë të pakrahasueshme më të mira se sa dje dhe plotësisht të njëjta në vendet e zhvilluara të Europës. Të gjitha këto mblidhen tek shpërblimi dhe paga. Por dikush ka të drejtë të thonë se Gjermania është shumë më para. Por jemi shumë më të vëmendshëm, por siç ju e dini jeta është ajo që ndodh kur ne jemi duke bërë plane të tjera. Autonomia do t’ju rrisë pagat atyre që punojmë më shumë, që bëjnë më shumë vizita, por ndërkohë do të garantojmë një pagë shumë më dinjitoze tavan,” tha Kryeministri Edi Rama para punëtorëve të shëndetësisë duke folur për autonomi në një vend ku asnjë institucion nuk ka autonomi por edinomi ndërsa përfundoi:
“Në 30 prill, mjekët specialistë do të marrin 50 mijë lekë të reja plus në pagën e tyre. Pra janë nga muaji prill dhe do të mbajmë zotimin për rritjen 7 % të pagës për mjekët dhe infermierët. Edhe mjekëve të përgjithshëm dhe infermierëve iu them se po përgatisim rritje proporcionale. Nëse në prill në ngjitemi lart në pagat e rajonit dhe barazohemi me Serbinë.”
