Gashi këshillon mërgimtarët: Mos kaloni nga Merdarja, po punohet!
Ministri i Punëve të Brendshme të Kosovës, Bejtush Gashi me rastin e vizitës në pikën kufitare në Merdare ku po zhvillohen punime, pas verifikimit të intensitetit të punës dhe shkallës së realizimittë projektit, së bashku me Zv/drejtorin e Policisë së Kosovës Naim Rexha, këshilloi të gjithë bashkatdhetarët që kanë vendosur të kalojnë nga Merdarja për të ardhur në pushime në Kosovë, të shfrytëzojnë pikat tjera kufitare përkatësisht pikë kalimeve tjera për arsye të pritjes në këtë pikë.
Pas takimit me komandantin e Stacionit Policor dhe përfaqësues të Doganës, Gashi bëri të ditur se pika kufitare në Merdare nuk do të mund të lëshohet deri në shtator për shkak të ngecjeve në punime.
“Sot erdhëm të vizitojmë dinamikën e punëve të investimeve të Unopsit, për faktin se ka disa ngecje, ka qenë e planifikuar që kjo pikë kufitare të lëshohet në fund të qershorit, mirëpo për arsye objektive nuk kanë arritur që të përfundojnë punët. Jemi në fazën e rëndësishme të fillimit të sezonës së ardhjes së bashkatdhetarëve tanë nga mërgimi dhe kjo është një nga pikat më frekuentuese, përkatësisht pjesa më e madhe e mërgimtarëve e shfrytëzojnë këtë pikë të kalimit kufitar. Për të parë nga afër se cilat janë sfidat që përballet aktualisht kjo pikë kufitarë, zyrtarët policor dhe doganat për të reflektuar karshi këtyre sfidave. Siç u informuam sot punimet do të zgjasin deri në shtator dhe nuk pritet që kjo pikë kufitare të lëshohet deri në shtator. Këto ngecje vijnë edhe si rezultat i disa sfidave të cilat kanë ardh për shkak të raporteve aktuale me Republikën e Serbisë dhe të cil at kanë ndikuar që disa punë dhe dinamika e punëve të tyre të ketë ngecje”, tha Gashi ndërsa këshilloi të gjithë bashkatdhetarët që kanë vendosur të kalojnë nga Mërdarja për të ardhur në pushime në Kosovë:
“Shfrytëzojë nga rasti që bashkatdhetarëve tanë që vijnë nga perëndimi, shfrytëzojnë pikat tjera kufitare përkatësisht pikë kalimeve tjera për arsye pritjet në këtë pikë, se sipas informacioneve që kemi, nga stacioni dhe komandanti i pikës kufitare janë diku 30 minuta. Policia është e mobilizuar, policia dhe dogana dhe përdorin edhe mundësi dhe lehtësira megjithatë për shkak të punimeve dhe infrastrukturës rrugore pritje mund të ketë.”
Ndërkohë Zv/drejtori i Policisë së Kosovës, Naim Rexha tha se Mërdarja dhe finalizimi i punimeve këtu janë të rëndësishme sidomos për implementimin e obligimeve që dalin nga marrëveshja për Menaxhimin e Integruar të Kufirit, derisa tha sa funksionalizimi i Merdares do të jetë shembull për rajonin.
Marrëveshja për Menaxhimin e Integruar të Kufirit ishte arritur në Bruksel gjatë bisedimeve teknike me Serbinë.
