Pastrim parash të Cosa Nostra, Rezart Taçi në kërkim, kunati dhe truproja dënohen 21 vite burg

Derisa biznesmeni Rezart Taçi vazhdon të jetë në kërkim, Gjykata e Posaçme e Apelit për Korrupsionin dhe Krimin e Organizua ka dënuar kunatin e Taçit, Artur Ballën, me 11 vite burg, dhe truprojën e tij, Bledar Lilon, me 10 vite burg, të akuzuar për pastrim parash, grup kriminal si dhe konfiskimin e shumës prej 18.399.941 euro.

Ndryshe, Prokuroria e Posaçme kundër Korrupsionit dhe Krimit të Organizuar, SPAK, Tiranë me përfundimin e hetimeve ka paraqitur në Gjykatën e Posaçme kundër Korrupsionit dhe Krimit të Organizuar kërkesë për gjykimin e çështjes penale në ngarkim të të pandehurve Rezart Taçi, Artur Balla dhe Bledar Lilo të akuzuar për veprat penale “Pastrimi i produkteve të veprës penale ose veprimtarisë kriminale”, “Grupi i strukturuar kriminal”, “Kryerja e veprave nga grupi i strukturuar kriminal”.

18.4 milionë euro të mafies italiane “Cosa Nostra” u bllokuan në një bankë në Shqipëri në nëntor 2021. SPAK thotë se Taçi do pastronte 18.4 milionë euro përmes lëvizjes në disa banka në disa shtete dhe do merrte përqindjen.

Nga hetimet e SPAK, Artur Balla dhe Bledar Lilo kanë pasur një rol aktiv për të ndihmuar italianët Francesco Zummon dhe ekonomistin Fabio Petruzzellan, të dy të arrestuar në Itali, të hapnin llogari bankare dhe të bënin transferta parash për pastrimin e tyre.