Fushata zgjedhore rritë rimbursimin e TVSH-së, 36% në tremujorin e parë

Fushatat elektorale si për zgjedhjet vendore dhe ato të përgjithshme nxisin një rritje të rimbursimit të TVSH-së ndaj biznesit.

Sipas të dhënave zyrtare nga Ministria e Financave gjatë 3-mujorit të parë të vitit 2023 u disbursuan ndaj bizneseve në formën e TVSH-së 3,8 miliardë lekë ose gati 36.5 për qind më shumë se një vit më parë.

Arkëtimet neto të TVSH-së nga tatimet dhe doganat ishin 49,7 miliardë lekë në janar-mars 2023 me një rritje 2.6 për qind në krahasim me të njëjtën periudhe të një viti më parë, por mbi 7 % e shumës u rikthye tek bizneset në formën e rimbursimit.

Siç shihet nga grafiku i mëposhtëm ecuria e rimbursimit të TVSH-se ndjek në mënyrë rigoroze vitet zgjedhore, ku ritmet e rritjes janë dukshëm më të larta.

Kulmi arriti në zgjedhjet parlamentare të vitit 2021, të cilat u mbajtën me 25 prill, teksa fondet për rimbursimin e TVSH-së në tremujorin e parë të atij viti pësuan rritje vjetore me 144%.

Gjithsesi Ministria e Financave po synon të mbajë larg impaktin buxhetor të fushatës. Në tremujorin e parë këtij viti buxheti ishte në gjendje suficitare, pasi të ardhurat pësuan rritje dhe shpenzimet kanë pasur ecuri të përmbajtur.

Rezultatet fiskale po tregojnë se fushata zgjedhore e ka dëmtuar buxhetin në aspektin e të ardhurave. Bashkitë kanë hezituar të grumbullojnë të ardhurat nga taksat lokale.

Arkëtimet nga pushteti vendor shënuan 5 miliardë lekë në tremujorin e tretë me rënie vjetore 34%. Grumbullimet ishin më rënie në të tre zërat e pushtetit lokal, taksa mbi ndërtesat me -3.4%, taksat mbi biznesin e vogël me -51% dhe taksa lokale me 39.5%.

Nga data 7 mars 2022, çdo kërkesë për rimbursimin e TVSH-së do të bëhet vetëm online, përmes Platformës Digjitale të Rimbursimit të TVSH-së. Platforma online e rimbursimit ka për qëllim eliminimin përfundimtar të kontakteve fizike me punonjësit e administratës tatimore, duke eliminuar çdo mundësi abuzimi, si edhe çlirimi i tatimpaguesve nga dokumentet në letër dhe nga koha e pritjes.

Mirëpo të dhënat mbi për disbursimin e TVSH-së tregojnë se me gjithë digjitalizimin dhe automatizimin e procesit në vitet zgjedhore shuma e fondeve të alokuara rritet ndjeshëm në krahasim me vitet normale./Monitor/