Zgjedhjet më të rëndësishme të Turqisë në një dekadë

Gjysma e popullsisë turke është shumë e re për të kujtuar qartë ndonjë lider tjetër përveç Presidentit Recep Tayyip Erdogan.

Gjatë dy dekadave, ai ka reformuar vendin, duke kërkuar të pohojë rolin e Islamit në shoqëri dhe duke mbrojtur fuqinë e fortë të Turqisë jashtë vendit.

Në zgjedhjet presidenciale të së dielës, fati i epokës së Erdoganit do të jetë i rrezikuar.

Partitë opozitare nga i gjithë spektri politik, janë bashkuar për të provuar të mposhtin Erdoganin, duke e fajësuar atë për ekonominë problematike të Turqisë, erozionin e lirive civile dhe reagimin e papërshtatshëm të qeverisë ndaj tërmeteve të muajit shkurt, që vranë mbi 50.000 njerëz.

Kemal Kilicdaroglu, sfiduesi kryesor, është antiteza e Erdoganit, duke e krahasuar vizionin e tij për një Turqi më demokratike dhe të bashkuar, me sundimin gjithnjë e më autoritar të Erdoganit dhe retorikën shpesh përçarëse.

Ai ka projektuar një imazh modestie, në krahasim me kompleksin presidencial prej 1000 dhomash të Erdoganit, të cilin Kilicdaroglu premton ta shndërrojë në “një muze të shpërdorimit” nëse zgjidhet.

Rezultati do të ketë ndikime botërore.

Erdogan ka kultivuar lidhje të forta me presidentin rus Vladimir Putin, duke nxitur paqëndrueshmëri në marrëdhëniet me aleatët si SHBA-ja dhe ka shkaktuar telashe në NATO, duke penguar përpjekjen e Suedisë për t’u bashkuar me aleancën ushtarake.

Ai ka shtuar përpjekjet diplomatike të Turqisë, duke e vendosur vendin si ndërmjetës në luftën e Rusisë kundër Ukrainës, si dhe duke ndihmuar ndërmjetësimin e një marrëveshjeje, që mundëson eksportet jetike të drithërave të Detit të Zi, duke lehtësuar çmimet botërore të ushqimit.

Kilicdaroglu, i cili dje akuzoi një grup rus për ndërhyrje në votim, premton një “ndërrim 180 gradë” në politikën e jashtme, që synon përmirësimin e lidhjeve me Perëndimin, si dhe me fqinjët si Siria.

Megjithatë, turqit konsumohen më shumë nga çështjet e brendshme, duke përfshirë krizën e rëndë të kostos së jetesës, e cila ka shërbyer si çështje e rëndësishme për fushatën e Kilicdaroglu, i cili pretendon se çmimet e perimeve do të trefishohen nëse Erdogan fiton.

Tani i takon 64 milionë votuesve të Turqisë, të vendosin në zgjedhjet më të rëndësishme të një brezi./Bloomberg/Monitor/