Drejtësi me regji të Edi Ramës!

nga Edi Paloka*

Nuk arrij ta lexoj plotësisht atë që do ndodhë me Ahmetajn! Fakt është që ndryshe nga ish-ministrat e tjerë të cilët “ja hodhen” me nga një akuzë për shpërdorim detyre, akuzat për Ahmetajn janë mjaft të rënda, aq sa për ta kalbur në burg. Edhe poshtrimi që i bëri Rama në media pas kontrollit që u ushtrua tek partnerja e tij, tregoi se marrëdhënia e tyre ishte e tensionuar. Duket sikur Ahmetaj nuk e ka pranuar kompromisin që Rama ju ka ofruar të tjerëve pra një akuzë të lehtë dhe disa muaj burg në këmbim të heshtjes së tyre.

Nuk ka idiot në këtë tokë që nuk e di se asnjëri prej ish-ministrave të Ramës nuk ka vepruar të paktën pa bekimin e Ramës. A mund të besojë kush se kanabizimi i vendit u bë prej Tahirit pa e ditur Rama?!

Po për inceneratorët; Mbledhja e firmave të gjithë ministrave dhe kryerja brenda pak orëve e procedurave që normalisht kërkojnë muaj të tërë që të kryhen, u bë pa bekimin e Ramës?! Ahmetaj dhe Koka kishin aq fuqi sa të vendosnin pa Ramën për qindramilionë euro?! E nëse do supozonim për një moment se ishte kështu, pse e mbrojti e vazhdon ta mbrojë Rama aferën e inceneratorëve?

Pse Veliaj që është edhe më i zhytur në këtë aferë është lënë tërësisht i paprekur ?

Ja pra që kemi të bëjmë si në çdo rast tjetër me “drejtësi” që funksionon me regji të Ramës si dhe kur i duhet atij?

I vetmi detaj që duket ndryshe në këtë rast, janë sjellja dhe akuzat e rënda ndaj Ahmetajt. Nëse Ahmetaj nuk e ka pranuar kompromisin, që të bëj burg për Ramën, kjo do të qartësohet se shpejti besoj.

Në fakt nuk ka asnjë shanc për të , përveç se të bëj të penduarin e drejtësisë.

Ndryshe do shohim të njejtin skenar të përsëritur; Një tjetër limon i shtrydhur që hidhet në kosh dhe Rama që fërkon duart dhe tall menderen nga pas!

*Kryetar i Këshillit Kombëtar të PD