Vrasja e 18 vjeçares, Gjykata: Burgim të përjetshëm Krivaqës, 15 vjet Sejdiut

Gjykata Themelore në Ferizaj ka dënuar me burgim të përjetshëm Dardan Krivaqën, kurse Arber Sejdiu e ka dënuar me 15 vjet burgim, për vrasjen e 19 vjeçares Marigona Osmanit ndërsa i ka liruar nga akuza për veprën e dhunimit.

Avokati i familjes së Marigona Osmanit, Gazmend Rexhepi, ka deklaruar pas përfundimit të seancës, se synim i tij ka qenë dokumentimi i vrasjes mizore të së ndjerës. Ai ka paralajmëruar ankesë për lirimin e Dardan Krivaqës nga akuza për dhunim.

Gazmend Rexhepi, tha se nuk pajtohet edhe me dënimin për 15 vite burgim ndaj Arbër Sejdiut, të akuzuar për ndihmë në kryerjen e veprave penale të vrasjes dhe dhunimit. Ai ka pohuar se vrasja e Marigonës ka qenë vrasja më e rëndë në Kosovën e pasluftës.

Familjarët janë shprehur të kënaqur më dënimin për Dardan Krivaqën, por jo edhe për Arbër Sejdiun.

“Me Dardan Krivaqën jemi plotësisht të lumtur, me të dytin jo. Kuptohet 15 vite, 2 i ka mbajt, 5 vite ia heqin, qysh funksionon këtu te na sistemi, por, e presim na. Ishalla kemi ymër edhe 15 vite e drejtojmë këtë situatë”, ka deklaruar axha i Marigona Osmanit, Remzi Osmani.

Ndërkohë që zhvillohej seanca gjyqësore, Kolektivi për Mendim dhe Veprim Feminist ka protestuar për të kërkuar drejtësi për Marigona Osmanin dhe ndëshkim maksimal për vrasësit e saj para Gjykatës Themelore në Ferizaj.

Me përfundimin e seancës, Kolektivi për Mendim dhe Veprim Feminist e mirëpriti vendimin e Gjykatës Themelorë në Ferizaj, me dënimin me burgim të përjetshëm ndaj Dardan Krivaqës duke theksuar se më në fund është sjellë pak drejtësi për Marigona Osmanin.

Ndryshe, më 22 gusht të vitit 2021, Marigona Osmani, 18 vjeç, vdes. Dardan Krivaqa, i cili jetonte me Marigonën në bashkësi jashtëmartesore, si dhe Arbër Sejdiu, akuzohen se me dashje dhe në bashkëkryerje e vranë 18-vjeçaren në Ferizaj, në tentim për ta fshehur kryerjen e veprës penale, dhunimi, një ditë më parë.