Zbardhet arsyeja e konfliktit në Vlorë, djali i anëtares së KLP sekser për të përfituar apartament

Pas sherrit në Vlorë që përfundoi me dhunimin deri në vdekje të ndërtuesit 55-vjeçar Armando Meshaut nga djali i anëtares së KLP, Rei Meta, zbardhen të tjera detaje.

Burime nga grupi hetimor bëjnë me dije se 33-vjeçari Rei Meta kishte ndërhyrë si sekser për një prej pronave që biznesmeni i ndërtimit kishte interes, duke i premtuar garanci se do t’i zgjidhte punë.

I riu kishte premtuar zgjidhje për pronën e Armando Meshaut, raporton BW, duke përdorur emrin e të ëmës, që është anëtarja e KLP-së, Nurihan Seiti Meta dhe për punën që do bënte do të përfitonte një apartament që do t’i falej nga ndërtuesi i njohur në Vlorë.

Por, 33-vjeçari nuk e kishte mbaruar punën si sekser dhe 55-vjeçari kishte zgjidhur çështjen me lidhje të tjera. Por 33-vjeçari pretendonte se ndërtuesi duhet t’i falte apartamentin dhe për këtë arsye nisi edhe konflikti mes tyre.

55-vjeçari kishte refuzuar t’ia kalonte në pronësi apartamentin Rei Metës dhe ditën e sotme u përballën në një kancelari në Vlorë aty konflikti verbal degradoi në dhunë fizike, ku si pasojë 55-vjeçari humbi jetën.

Rei Meta djali i anëtares së KLP ka dhënë dhe dëshminë e tij lidhur me ngjarjen e rëndë të ndodhur ditën e djeshme në Vlorë.

“Nuk ka pasur qëllim që të vras 55-vjeçarin dhe se në kancelari ai me viktimën janë takuar rastësisht dhe se të dy do të printonin disa dokumente,” është shprehur në dëshminë e tij Rei Meta, i cili pas sherrit me 55-vjeçarin Armando Meshau, të cilin e goditi me grushte, Meshau ndërroi jetë.

Gjithashtu, raporton BW, në dëshmi Rei Meta thotë se viktima, Armando Meshau e ka ofenduar i pari dhe ky e ka goditur kur konflikti ka agravuar. 33 vjeçari pretendon se ka goditur për vetëmbrojtje dhe se 55-vjecari e ka humbur jetën nga përplasja me tokën.