Presidenti i Serbisë kundër ndërkombëtarëve, liron Milan Radoiçiçin!
Presidenti i Serbisë, Aleksandar Vuçiç, jo vetëm që nuk ekstradoi terroristin Milan Radoiçiç, pranë autoriteteve kosovare pasi Bashkimi Europian e tha qartë se Policia e Kosovës ka mandat për t’i hetuar sulmet që janë bërë në Banjskë të Zveçanit më 24 sthator, ndërsa Serbia e ka obligim të bashkëpunojë, pa kushte, por e liroi fare terroristin Radoiçiç.
Me vendim të Gjykatës së Lartë të Serbisë, Milan Radojiçiç si i dyshuari kryesor për vrasjen e rreshterit Afrim Bunjaku më 24 shtator në Banjskë të Zveçanit, dhe i vetëdeklaruar si udhëheqës i një grupi terrorist që sulmoi policinë e Kosovës në veri, u lirua nga paraburgimi .
Pasi dëgjoi të pandehurin Milan Radoiçiç, raportojnë mediat serbe, gjyqtari i procedurës paraprake në Serbi, hodhi poshtë propozimin e Prokurorisë së Lartë Publike në Beograd për të caktuar masën e paraburgimit, për shkak të rrezikut të arratisjes.
Sipas vendimit të Gjykatës së Lartë, Radoiçiçit i është ndaluar largimi nga territori i Serbisë pa miratimin e Gjykatës dhe i është ndaluar të shkojë në Kosovë. Gjithashtu Gjykata i ka caktuar paraqitje në komisariatin e policisë me datën 1 dhe 15 të çdo muaji, si dhe i është konfiskuar pasaporta e Serbisë.
Prokuroria e Lartë Publike në Beograd e akuzon Radoiçiçin se ka blerë armë, municione dhe mjete shpërthyese të fuqisë së madhe shkatërruese në Tuzëll të Bosnje Hercegovinës, nga janari 2023 deri më 24 shtator të këtij viti, kur edhe ka kryer sulmin në veri.
Por, nga dëshmitë që ka publikuar Policia e Kosovës shihet se armët janë të Serbisë, përkatësisht të Ushtrisë së Serbisë.
Ndryshe, Milan Radoiçiç është në listën e zezë të SHBA dhe Britanisë së Madhe. Institucionet në Kosovë kanë kërkuar ekstradimin e tij në mënyrë që ai të gjykohet në Kosovë për krimet që ka bërë.
