“NATO po shton trupat e KFOR-it, jo për shkak të kërkesës por sjelljes së Serbisë!”
Pas sulmit terrorist në fshatin Banjskë në veri të Kosovës, janë rritur kërkesat mbi shtimin e trupave të KFOR-it në veri, në veçanti nga pala serbe.
E përditshmja serbe “Danas” duke konfirmuar miratimin e NATO-s për dërgimin e trupave shtesë në Kosovë nga kontingjenti i Britanisë së Madhe, mëson nga bashkëbiseduesit se kjo ka ndodhë jo për shkak të kërkesës së zyrtarëve serbë.
Politologu Ognjen Gogiç thekson se NATO po dërgon trupa shtesë, por kjo nuk po ndodhë pse pala serbe kërkon nga KFOR-i që të rritë numrin e trupave në veri dhe të kujdeset për sigurinë në veri të Kosovës, por për shkak të sjelljes së Serbisë.
“NATO ka miratuar dërgimin e forcave shtesë në Kosovë që do të vijnë nga Britania e Madhe. Deri te shtimi i pranisë së KFOR-it nuk do të ndodhë për shkak të kërkesës së Serbisë, por para së gjithash për shkak të sjelljes së saj.
Një pjesë e bashkësisë ndërkombëtare, pjesë e Quintit, e cila vendos për dislokimin e trupave të NATO-së në Kosovë, ka tjetër këndvështrim për situatën e sigurisë në Kosovë nga Beogradi. Tani po perceptohet se pala serbe ka potencialin për të cenuar sigurinë në Kosovë.
Konsiderohet padyshim se fajtori i incidentit të armatosur në Banjskë është formacioni i armatosur i Milan Radoiçiçi, deri sa ditëve të kaluara nga kryeqendrat perëndimore është kërkuar që Serbia të largoj forcat e saja ushtarake nga kufiri. Nga ana tjetër, u konfirmua se të gjitha a aksionet e Policisë së Kosovës janë zbatuar në bashkëpunim me forcat ndërkombëtare që janë prezent në terren,” thekson Gogiç i cili ndonëse terroristët serb i cilëson “formacion ushtarak” ashtu sikur se Presidenti i tij Vuçiç, e pranon se Quinti nuk ndanë mendimin me Beogradin se njësitet speciale të Policisë së Kosovës janë fajtore për acarimin e situatës së sigurisë në veri të Kosovës dhe ato duhet të tërhiqen në vendin e tyre dhe të zëvendësohen me forcat ndërkombëtare.
“Konsiderohet se Beogradi është përgjegjës për situatën e krijuar duke provokuar me qëllim incidente ose që nuk arrin të kontrolloj forcat e saj të sigurisë. KFOR-i nuk do të marrë drejtimin në veri të Kosovës në vend të institucionet kosovare, por do ta mbështes veprimin e tyre.
KFOR-i, kurrë nuk e ka pasur në Kosovë rolin që sot kërkon Beogradi ta marrë në veri të Kosovës,“ thekson politologu serb duke sqaruar se pushtetin civil në Kosovë, duke përfshirë dhe veprimin policor, e ka kryer UNMIK-u, misioni i OKB, deri sa KFOR ishte mision ushtarak i ngarkuar për paqen.
“Megjithatë, edhe kur KFOR-i kishte prani të dukshme në terren nuk ka arritur të parandaloj dëbimin dhe rrëmbimet e serbëve pas luftës dhe trazirave të marsit,“ tha Gogiç.
Kryetari i Iniciativës qytetare “Mbijetesa Serbe”, Aleksandar Arsenijeviç nga Veriu i Mitrovicës, konsideron se rritja e trupave të KFOR-it nuk do të ndikoj në zgjidhjen e situatës në terren.
“Jam i sigurt se do të ndodhë rritja e trupave të KFOR-it në mjediset e banuara me serbë, por kjo nuk do të ndikojë në zgjidhjen e situatës, përveç se nëse nuk marrin përsipër monitorimin ose një protektorat për të cilin unë jam angazhuar në kohë të fundit. Kërkesa është shumë e arsyeshme sepse jemi në situatën ku qytetarët mendojnë se janë mbështetur për muri para togës së pushkatimit,“ thotë Arsenijeviç për të përditshmen serbe “Danas”.
Po këtë kërkesë Presidenti i Serbisë, Aleksandar Vuçiç e ka theksuar në një intervistë për CNN, ndërsa Kryeministri Edi Rama ka kërkuar që KFOR-i ta merr kontrollin në veri, pa e pyetur njeri! Ndërkohë Ministri i Mbrojtjes së Serbisë, Milosh Vuçeviç duke përshëndetur dërgimin e 200 trupave në kuadër të KFOR-it nga Britania e Madhe tha se edhe në takim me Ambasadorin britanik, Edward Ferguson, është shprehur se njëri ndër prioritetet e Ushtrisë së Serbisë është bashkëpunimi me KFOR-in, dhe se për Serbinë është e rëndësishme që NATO të ketë status neutral në zgjidhjen e problemit.
