Me Komandantin e NATO-s, Osmani: Serbia t’i tërheq trupat ushtarake nga kufiri me Kosovën

Duke falënderoi NATO-n për mbështetjen e vazhdueshme në ruajtjen e stabilitetit dhe paqes në Kosovë dhe rajon, pas aktit të agresionit dhe sulmit terrorist të Serbisë ndaj Kosovës më 24 shtator, Presidentja Vjosa Osmani në takim me Komandantin e Komandës së Forcave të Përbashkëta Aleate të NATO-s në Napoli, Admiralin Stuart B. Munsch, theksoi se Serbia duhet t’i tërheq trupat e saj ushtarake nga kufiri me Kosovën pasi që ato përbëjnë rrezik për paqen dhe stabilitetin në rajon.

“Presidentja Osmani theksoi nevojën e marrjes së masave konkrete kundër Serbisë pas aktit të agresionit dhe sulmit terrorist nga grupet paramilitare dhe kriminale të udhëhequra në terren nga Milan Radojiçiç dhe politikisht nga Aleksandar Vuçiqç Ajo nënvizoi se Serbia duhet t’i tërheq trupat e saj ushtarake nga kufiri me Kosovën pasi që ato përbëjnë rrezik për paqen dhe stabilitetin në rajon,” thuhet në komunikatën e Presidencës.

Rritja e sigurisë përgjatë kufirit Kosovë-Serbi, tha Presidentja Osmani me këtë rast, është veprim i nevojshëm për ta parandaluar përsëritjen e aktit të ndodhur më 24 shtator.

Ndryshe, në takim, u theksua rëndësia e bashkëpunimit të ngushtë në mes institucioneve të sigurisë së Kosovës dhe atyre të NATO-s, në ballafaqimin me sfidat e sigurisë në vend dhe rajon.