A do e lejojë Edi Rama, Ilir Metën të bëjë pushimet në vilën qeveritare…

Në verën e vitit 2015-ë, Qeveria Rama dhe Presidenti i asaj periudhe, Bujar Nishani, patën një përplasje deklaratash, lidhur me atë që u konsiderua skandal për kohën, pasi qeveria nuk i dha mundësinë Kreut të Shtetit të shfrytëzonte vilën qeveritare të Dhërmiut për të bërë pushimet.

Në atë kohë “hakmarrja” e qeverisë u lidhe me përplasjet dhe qëndrimet e vazhdueshme të Presidentit Nishani lidhur me kthimin për shqyrtim në Kuvend të disa nismave ligjore të ekzekutivit.

Sot jemi sërisht në një sezon veror, Kryeministër është sërisht Edi Rama, ndërsa President është Ilir Meta.

Në tavolinën e Presidentit tashmë është ligji për Teatrin Kombëtar, sipas të cilit godina aktuale do të shembet dhe do të ndërtohet një tjetër, ndërsa në territorin rreth saj, do të ngrihen të paktën 6 kulla.

Kuvendi ka njoftuar mbylljen e sesionit parlamentar më 23 korrik, ndërsa Presidenti ka afat për firmosjen ose jo të ligjit deri më 30 korrik. Kjo sipas opozitës është interpretuar si një tërheqje e qeverisë, por mund të jetë edhe një dekretim i ligjit, që do t’I hapte rrugën shembjes së godinës.

Nëse Meta nuk dekreton ligjin, atëherë me nisjen e sesionit të ri në Kuvendin e Shqipërisë, në shtator, do të shihet nëse Rama do të tentojë të kalojë edhe njëherë për votim ose jo ligjin e shumëdebatueshëm. Por nëse Meta dekreton ligjin, atëherë do të ketë një tjetër situatë.

Sot Presidenti zgjodhi të flasë me një gjuhë diplomatike, duke mos dhënë garanci as për PO as për JO, por u shpreh se do të zbatojë kompetencat e tij ligjore dhe Kushtetuese.

Nga moment që Meta ka marrë detyrën e Presidentit të Republikës dekretimi i ligjit për Teatrin mund të konsiderohet nga vendimmarrjet më problematike. Më parë ai nuk ka dekretuar propozimin e Ramës për kreun e SHISH, duke bërë që ky institucion të ketë një drejtues të komanduar. Sot Meta është në një tjetër provë përballë ish-aleatit të tij në qeverisje, Edi Rama, dhe Kryebashkiakut, Erjon veliaj, që e mbështeti në 2015-ën për të drejtuar bashkinë më të madhe të vendit.

Nëse i thotë JO Ramës, atëherë kryeministri mund t’i bëjë të veprojë në të njëjtën mënyrë sikundër me ish-Kreun e Shtetit, duke mos i dhënë të drejtën e përdorimit të vilave qeveritare. Politika në Shqipëri ka treguar se mund të ndodhin edhe “hakmarrje” të tilla primitive. Mbetet për tu parë nëse Rama do të përdorë të njëjtin standart si me ish-Presidentin Nishani, apo do të vënë në funksion dystandardizimin, sikundër e përdor shpesh…