Izraeli: Operacioni i fundit në Gazë! Hamas: Izraelitët vranë 4.741 palestinezë!

Ministri i Mbrojtjes i Izraelit, Yoav Gallant, tha në Qendrën operative të forcave ajrore izraelite se fushata ushtarake mund të zgjasë një muaj, dy ose tre, por në fund nuk do të ketë më Hamas. 

“Në aspektin operativ të manovrimit, në fund të ditës, asgjë nuk do të ndal Forcat izraelite të Mbrojtjes, IDF. Ky duhet të jetë operacioni ynë i fundit manovrues në Gazë, për arsyen e vetme sepse pas këtij operacioni nuk do të ketë më Hamas,” ishte i prerë Yoav Gallant.

Duke falendëruar forcat ajrore, Ministri i Mbrojtjes i Izraelit, Yoav Gallant, tha se faza e ardhshme, i shumëprituri operacioni tokësor, “do vijë së shpejti”. 

Sa shpejtë, mbetet e paqartë.

Ministria e Shëndetësisë në Gazë: Izraelitë vranë 4.741 palestinezë

Ministria e Shëndetësisë në Gazë që drejtohet nga Hamasi thekson se sulmet izraelite deri më tani kanë lënë të vdekur 4.741 palestinezë dhe 15.898 të plagosur, që nga dita kur fushata e ushtrisë izraelite ka filluar më 7 Tetor si përgjigje ndaj sulmit të papritur të Hamasit ndaj Izraelit ku u vranë 1.400 izraelitë, kryesisht civilë.

Ndërkohë ushtria izraelite ka publikuar foto që, sipas IDF, tregojnë vende të shumëta prej nga lancohen raketat e Hamasit, e që janë vendosur afër infrastrukturës civile brenda Rripit të Gazës.

“Hamasi po kërcënon banorët e Gazës, izraelitët dhe bashkësinë ndërkombëtare,” theksojnë Forcat izraelite të Mbrojtjes, IDF, duke publikuar fotot në rrjetin social X.