Imuniteti i Sali Berishës në Këshillin e Mandateve, prokurorët e zhgënjyer pse nuk mund të votonin

Mbi katër orë spektakël i Këshillit të Mandateve dhe Imuniteteve të koalicionit qeverisës Rama-Basha kishte një epilog dramatik, ku pas miratimit nga ana e gjashtë deputetëve të këtij koalicioni kriminal të kërkesës së Prokurorisë së Posaçme, SPAK, për heqjen e imunitetit të deputetit Sali Berisha, të zhgënjyer ngelën prokurorët e kësaj Prokurorie që nuk kishin mundësi ta votonin këtë përndjekje politike të Kryetarit të PD dhe Ish-Kryeministrit Sali Berisha.

Shqyrtimi i kërkesës së Prokurorisë së Posaçme Kundër Korrupsionit dhe Krimit të Organizuar për dhënien e autorizimit nga Parlamenti për arrestimin/heqjen e lirisë së deputetit Sali Berisha në çështjen e privatizimit të ish-kompleksit Partizani, ishte një tragjikomedi që kishte një ngjashmëri të frikshme me rastin e trafikantit ndërkombëtar të drogës, Ish-Ministrit të Brendshëm, Saimir Tahiri, vetëm se gjithçka që nuk vlente për Sajme Qorrin ishte shumë në rregull për koalicionin qeverisës Rama-Basha.

Ndonëse ky votim ishte vetëm miratim për ti kaluar seancës plenare të së enjtes për votimin e heqjes së mandatit të deputetit Sali Berisha, në fund të kësaj mbledhje prej 251 minutave të Këshillit të Mandateve dhe Imuniteteve, gjashtë deputetëve të koalicionit Rama-Basha dhe dy prokurorëve të Partisë Socialiste, Arben Kraja dhe Enkeleda Millonai, u shkëlqenin sytë nga ekzaltimi thuajse kishin vendosur ta çojnë Sali Berishën në gijotinë.

Ndryshe, me këtë vendim të Këshillit të Mandateve u krijuan edhe dy precedente: Imuniteti mund ti hiqet një deputetit edhe kur nuk ka prova; Dhe, imuniteti mund ti hiqet deputetit edhe kur ka vetëm akuza ndaj tij kur ai ishte Kryeministër!