27% e punonjësve shqiptarë janë të mbikualifikuar për punën që bëjnë

Gati 40 për qind e punonjësve shqiptarë me pagë kanë një nivel arsimi që nuk përputhet me punën që bëjnë.

Të dhënat nga Anketa Europiane për Aftësitë dhe Tregun e Punës në Shqipëri tregojnë se, pothuajse një në tre shqiptarë, 27 për qind, raportojnë se kanë një arsim më të lartë se sa kërkon vendi i tyre i punës, ndërsa më shumë se një në dhjetë, 12 për qind, thonë se janë të nënkualifikuar për pozitën aktuale të punës.

Burrat kanë pak më shumë gjasa, 28 për qind, të tregojnë se kanë një arsim më të lartë se sa ajo që kërkon vendi i punës sesa gratë 25 për qind.

Të anketuarit e moshës 25-34 dhe 55-64 vjeç kanë gjithashtu më shumë gjasa të deklarohen se janë të mbikualifikuar se sa punëtorët e moshës mesatare, 32 për qind dhe 37 për qind, e atyre të moshës 25-34 dhe 55-64, thonë se janë të mbikualifikuar kundrejt një në pesë në mesin e punëtorëve të moshës së mesme.

Gati një e treta, 34 për qind, e të anketuarve me nivel të ulët arsimor tregojnë se janë të mbikualifikuar për punën që bëjnë, ndërsa vetëm 14 për qind të atyre me arsim të lartë mendojnë në këtë mënyrë.

Një në pesë, 20 për qind, nga ata me arsim të nivelit të ulët thonë se kanë një arsim më të ulët se sa kërkon vendi i tyre i punës, krahasuar me një në dhjetë, 10 për qind, të atyre me arsim të mesëm dhe 6 për qind të atyre me arsim të nivelit të lartë.

Përqindja më e lartë e punëtorëve të mbikualifikuar mund të gjendet edhe në mesin e atyre që mbajnë pozita gjysmë të kualifikuara, 41 për qind, ky është rasti i 28 për qind të punëtorëve që merren me punë manuale, 23 për qind e atyre që punojnë në profesione elementare dhe vetëm 12 për qind e atyre që punojnë në profesione të kualifikuara.

Rreth 31 për qind e të punësuarve në shërbime e konsiderojnë veten të mbikualifikuar për punën e tyre, 27 për qind të punëtorëve në bujqësi apo industri dhe 19% e atyre që punojnë në sektorin publik, arsim dhe shëndetësi.

Rreth 32 për qind e punëtorëve që përdorin njohuritë dhe aftësitë e tyre në një masë të vogël ose aspak, tregojnë se janë të mbikualifikuar kundrejt 24 për qind e atyre që përdorin njohuritë dhe aftësitë e tyre në një masë të moderuar ose të madhe.

Afër një në tre, 31 për qind, e të anketuarve në Shqipëri raportojnë se puna e tyre kërkon arsim të lartë (krahasuar me 38 për qind në EU27 dhe 26 për qind në Ballkan).

Një përqindje e ngjashme, 34 për qind, thonë se puna e tyre kërkon një arsim të mesëm të ulët ose më poshtë, krahasuar me një në pesë, 19 për qind, në BE-në dhe në Ballkan, 20 për qind.

Shumica e punonjësve shqiptarë punojnë në vende pune që kërkojnë një fushë studimi të tyre ose të ngjashme./Monitor/