Kur zoti Rama kritikon Kosovën, por nuk flet për sukseset e saj!
Prof.Dr.Enver Bytyçi
Kosova fitoi vendin e anëtarit të asocuar në Asamblenë Parlamentare të NATO-s! Kosova kaloi sprovën e parë dhe kryesoren, sipas mendimit tim, për t’u pranuar në Këshillin e Evropës. Studentët e Fakultetit Juridik të Universitetit të Prishtinës fituan vendin e tretë në botë në një konkurs ndërkombëtar ku merrnin pjese përfaqësues të rreth 400 universiteteve të globit, ndër ta edhe ato më famozët universitete. Kosova shënon thuajse çdo ditë suksese dhe fitore të rëndësishme, ose të dorës së dytë.
Megjithatë kryeministri Rama nuk është ndalur të shkruajë asnjë fjalë, asnjë resht, për këto arritje të jashtëzakonshme të Kosovës e të institucioneve të saj. Heshtje e plotë. Kaluan kaq ditë dhe asnjë përshëndetje! Është ai kryeministër që për çdo kritikë që i bëhet qeverisë së Kosovës ose kryeministrit të saj nga Aleksandër Vuçiq dhe diplomatë ndërkombëtarë, do të mbajë qëndrim negativ e kundër Kosovës. Është po ai kryeministër që thirri presidentin e Francës në Tiranë vetëm që t’i thoshte Albin Kurtit se “Franca do të bllokojë liberalizimin e vizave, nëse kryeministri nuk lëviz për zgjedhjet në komunat e veriut”! Është po ai kryeministër që pas Banjskës thoshte se veriu, ku ndodhi akti terrorist serb “është tokë e askujt”! Është po ai kryeministër që hartoi një projekt serb të asociacionit të komunave ku jeton komuniteti serb dhe ia dërgoi presidentit Macron si dhe kancelarit Scholz. Është gjithashtu po ai kryeministër që në takimin e Tetorit në Tiranë me Scholz e nxiti atë të fliste kundër Kurtit dhe Kosovës, por që nuk mundi ta lëshojë kancelarin gjerman në hullinë e provokimeve të tij!
Ky kryeministër, më i miri nga të gjithë kryeministrat e Shqipërisë për Serbinë që nga koha e Pashiqit, (1913-1926) nuk flet, nuk e hap gojën, nuk thotë asnjë fjalë të mirë, kur Kosova arrin suksese spektakolare në integrimin e vendit ose në forcimin e shtetësisë së saj! Pse? Pse nuk flet për këto arriitje kryeministri ynë, ndërsa nuk përton të flasë me tone të larta e në mënyrë të përsëritur edhe për një urë të nisur para dhjetë vitesh mbi lumin Drin i Zi në Kukës?! Për një urë 330 m të gjatë e me një kosto 35 milion auro, ose një milion euro për 9.5 m linear?!
Sepse propaganda e tij për urën maskon korrupsionin e lartë dhe evident të tij në këtë vepër! Sepse përmendja e sukseseve të Kosovës zbulon e demaskon dështimet e veta. Sepse të flasë për arritjet e Kosovës do të duhet t’i kundërvihet vëllait të tij binjak, Aleksandër Vuçiq. Edi Rama ka qenë prezent në samitin e Pragës (2022) kur Vuçiq në mbrëmjen informale thoshte se “Ne me qeverinë dhe autoritetet e Kosovës nuk merremi vesh për asgjë, por me vëllain tim binjak, Edi Ramën, bisedojmë dhe pajtohemi për gjithçka”! E ka dëgjuar me veshët e tij dhe është gëzuar për fjalët e presidentit serb në adresë të tij. E kanë dëgjuar edhe 44 kryetarë shtetesh dhe kryeministra të Evropës gjithashtu, disa prej të cilëve mund të jenë gëzuar, por shumica kanë reaguar me habi!
Pse zoti Rama nuk gjen kohë ta thotë vlerësimin e tij, qoftë dhe negativ, për këto zhvillime? Sepse sukseset e Kosovës i bëjnë hije atij dhe autoritetit që ushqen ose dëshiron të ushqejë te shqiptarët në Ballkan. Zoti Rama, i mësuar me propagandë mashtruese, lë menjanë sukseset e atyre që nuk i ka në xhepin e tij. Madje nuk i dëshiron as sukseset e bashkëpunëtorëve të tij, sepse është në kërkim vetëm të hijes së vet!
Megjithatë shoh edhe një mundësi tjetër për heshtjen e zotit Rama! Ai është përfshirë në afera të tilla, të cilat kanë kaluar çdo limit. Tashmë duket se e kanë lëshuar gjithashtu miqtë e tij të lidhur me Sorosin. Sepse në vend që ta kenë aktor e faktor, ai është shndërruar në vetë problemin e qeverisjes, demokracisë e madje të sigurisë në Shqipëri e në rajon. Në këto kushte atij nuk ia ndjen më as për Kosovën, as për Shqipërinë. Nuk i hyjnë në sy as sukseset e as dështimet e të dy shteteve përkatëse. Thjesht kujdeset për të ruajtur dhe shpëtuar sa më shumë nga ndëshkimi për mëkatet e tij. Jo rastësisht është ringrit afera Olsi-Edi! Duket se Rama pret furtunë. E njeriut në mes të stuhisë nuk i shkon më mendja të merret me të tjerët!
