Sistemi e-taxation, Tatimet tender 1.5 mln euro për përmirësimin

Drejtoria e Përgjithshme e Tatimeve parashikon të zgjerojë funksionalitetet në sistemin e-taxation, lidhur kjo edhe nga ndryshimet në ligjin për tatimin mbi të ardhurat.

Një procedurë e çelur sot, në faqen e Agjencisë së Prokurimit Publik, nën emërtimin “Përmirësimi i Sistemit e-taxation – për Drejtorinë e Përgjithshme të Tatimeve” nënvizon në dokumentet që e shoqërojnë pikërisht këtë specifikë.

Në kërkesën për operatorin që do të fitojë procedurën, termat e referencës nënvizojnë te përshkrimi i detyrës se “Nisur nga hyrja në fuqi e projektligjit “Për Tatimin mbi të Ardhurat”, i cili përcakton mënyra të reja për mbledhjen dhe administrimin e tatimit për marrëdhëniet që lindin në fushën e tatimit mbi të ardhurat personale, tatimit mbi fitimin e të ardhurave të biznesit, si dhe të tatimit të mbajtur në burim të të ardhurave; udhëzimit për “Tatimin mbi Vlerën e Shtuar” është konstatuar nevoja e përmirësimit të Sistemit.

Operatori ekonomik fitues duhet të realizojë të gjitha kërkesat që rrjedhin nga zbatimi i ligjit Nr 29/2023 “Për Tatimin mbi të Ardhurat”, por edhe rishikimin e ndërveprimeve me sisteme/regjistra të tjerë elektronik dhe jo vetëm, kur kërkohen nga ndryshimi i legjislacionit në fuqi”.

Realizimi i kësaj detyrën nga ana e operatorit fitues pritet që kalojë një sërë fazash sikurse parashikohet në dokumente.

Faza I: Analizimi i kërkesave, sistemit ekzistues dhe ndryshimeve të bazës ligjore. Kjo fazë është faza përgatitore ku operatori ekonomik fitues duhet te bëjë një analizë të plotë të të gjitha procedurave administrative dhe ligjore.

Faza II: Përmirësimi i sistemit e-Taxation. Në këtë fazë fillon përmirësimi i sistemit duke zhvilluar kërkesat sipas ndryshimeve ligjore dhe këtyre termave reference.

Faza III: Testimi i sistemit të përmirësuar, trajnimi i stafit për përmirësimet e bëra dhe marrja në dorëzim e tij. Kur çdo gjë të jetë gati për pune do të bëhet testimi i sistemit të përmirësuar, trajnimi i stafit dhe marrja në ngarkim e tij.

Për të realizuar gjithë përmirësimet e nevojshme në sistem sipas kërkesës së ligjit parashikohet nja afat 12 mujor nga data e nënshkrimit të kontratës./Monitor/