Pórnai Lali Eri!
nga Agim Popoci
Kolegë i prokurorëve të Prokurorisë së Posaçme kundër Korrupsionit dhe Krimit të Organizuar, ishte dilema që iu shtua Kryetarit të Bashkisë Tiranë, Erion Veliaj, kur në orët e fundit të muajit prill, më në fund doli nga SPAK-u!
U krijua përshtypja se Erion Veliaj sapo doli nga Prokuroria e Posaçme pa pranga, të gjitha i tha, të gjithë i akuzoi, por, atë më thelbësoren sikur e harroi:
Kush ia fali mandatin e tretë si Kryetar i Bashkisë Tiranë, Edi Rama apo SPAK!
Pavarësisht se ngatërroi dynjanë duke gënjyer se po shkonte si vullnetar që kishte dijeni për çështjen e inceneratorit të Tiranës, dhe doli duke thënë sikur kishte takuar kolegët prokurorë, ky njeri i përdorur nga të gjithë politikanët e tranzicionit, nuk e kuroi dot më me fjalë dhe makinacione mediatike imazhin e tij, ndonëse ka kohë që ka filluar një tjetërsim të personalitetit të tij në mënyrë që të dalë në ditën e gjykimit para SPAK-ut si një Marie Antoinette që do ti pritet koka, por, nuk ka lidhje me atë për të cilën akuzohej!
Kur Lali Eri me bandën e tij filloi rrëzimin e pushtetit të Fatos Nanos, shumë kundërshtarë të liderit socialist mund të ishin sponsorët e një aksioni politik, por kjo lëvizje vetëm Mjaft nuk ishte!
Dyshimet për Ilir Metën dhe gishti nga Edi Rama kishin 1001 arsye për ta bindur opinionin publik se ishin në shërbim të tyre, por, lejimi të përdoret edhe nga lideri demokrat Sali Berisha, vetëm e vetëm për të mënjanuar nga skena politike qëllimin e dhënë nga pronari, Fatos Nanon, konfirmoi se Lali Eri nuk ishte vetëm një njeri në shërbim të Kryetarit të Bashkisë Tiranë në atë kohë, Edi Rama, por një Pórnai që do t’i kishte zili edhe poeti i Greqisë Arkaike, Archilochus.
Po, po, Pórnai sepse Hetaíra nuk bëhej dot me nivelin intelektual që kishte dhe ka, dhe, është e paimagjinueshme të krahasosh Lali Erin me një Hetaíra si për shembull Teodotën, dashnoren e Alkibijadit dhe filozofit Kebet, me të cilin Sokrati diskuton në veprën e Ksenofontit “Kujtimet e Sokratit”; Pra, vetëm Pórnai, prostitutë e këtij niveli të ulët që edhe në Greqinë e Lashtë kishte një pronar, Pornoboskós, i cili përcaktonte shumën për tu paguar, bazuar nga të ardhurat e realizuara!
Ka shumë prej bashkëpunëtorëve të Lali Erit dhe jo vetëm, që e arsyetojnë rolin e Pórnait që mori përsipër shitësi i fiqve, dhe u bë ai që u bë në këtë botë politike shqiptare sepse, sipas tyre, nuk depërton dot pa qenë i tillë! Por, as kjo logjikë shqiptare që përdoret si për ata që shesin dhe trafikojnë drogë me maune nuk qëndron, sepse edhe në Greqinë e Lashtë nuk kishte Pórnai që synonte të bëhej Hetaíra, por vetëm një shkallë më lartë, E pavarur!
Problemi është se Lali Eri është një qenie e palexuar për ta kuptuar dhe Pórnain që vetë e luan në strategjinë e tij politike që nga partia e famshme G-99, ndryshe do ta kuptonte poetin Archilochus që me mjeshtëri arriti ta përshkruaj një prostitutë Pórnai që i shërben si një hamalli e tregtari, ashtu dhe marinari ose kapiteni, dhe kjo padyshim që do ti bënte dhe një shërbim të madh njeriut që po synonte ta zëvendësonte shefin e vet, nga kthinat ku fuste hundët dhe gjithçka që i kërkonin rrethanat!
Si i tillë, ai vazhdoi si Pórnai i Edi Ramës e me raste edhe Ilir Metës kur arriti të bëhet Kryetar i Bashkisë Tiranë, dhe kur e kuptoi se jo të gjitha paratë e Pornoboskósit nuk ishin të pista!
Dhe jo vetëm kaq!
Ndërtuesit, oligarkët, tenderat, lejet, Pórnai i Edi Ramës e kuptoi se nuk ishin legjenda urbane por pushtet, madje që mund të preket!
Prekja e këtij pushteti pa lejen e Pornoboskósit Edi Rama ishte fatale dhe fillimi i fundit i Lali Erit dhe karrierës së tij, pavarësisht se për një kohë të shkurtër u bë tmerri i pronarëve të mediave, ndërtuesve dhe orligarkëve, si dhe miku i shtrenjtë i George dhe Alex Sorosit!
Kur shpërtheu skandali i madh i inceneratorit të Tiranës dhe filloi të shtrohet pyetja se a do të arrestohet Lali Eri apo Edi Rama, Pórnai bëri gabimin e radhës duke luajtur Marie Antoinetten.
Ndoshta Lali Erin do ta besonte dikush se ai sikur Marie Antoinette nuk dinte gjë për varësen e diamantit, se nuk shpenzonte, i jepte biçikletës, përdorte transportin urban; Por, bashkëpunëtorët e tij nuk ushqeheshin më me suflaqe por tashmë ishin pronar me hotele, djali i tij nuk shkonte më në kopsht publik por si të gjithë ata që i kishte akuzuar, bashkëshortja kishte harruar jetën normale edhe pse ishte vetëm një avokate, dhe, 5D nuk ishte thjeshtë një skandal që kolegët e SPAK-ut ashtu si kolegu Fusha do ja mbyllte, sepse kishte prekur atë që nuk thuhet, Edi Ramën!
Sot askush nuk mund të thotë se deri në ditën kur shkeli në SPAK, Erion Veliaj nuk kishte pushtet dhe kjo u konfirmua edhe kur vajti në SPAK dhe asnjëri prej televizioneve kombëtare, që për pronarë kanë oligarkët e këtij vendi, nuk e transmetoi!
Por, pas tetë orëve në Prokurorinë e Posaçme, Lali Eri e kuptoi se thirrja në SPAK ishte vetëm sebepi, si varësja me diamant e Antoinettes që i fundosi autoritetin, dhe dihet historia me lumin e akuzave që e çuan në gijotinë!
A do ta gëzoj mandatin e tretë Kryetari i Bashkisë Tiranë, Erion Veliaj, kjo varet vetëm nga ai që i dhuroi këtë mandat, ai që nuk lejoi të realizohet procedimi i bërë 4 vjet më parë, dhe, ai që dha leje jo vetëm për krimin elektoral të vitit 2023, por dhe atij 2021 ku 5D kishte rolin kryesor në kryeqytet:
Edi Rama ose SPAK!
E shiti apo jo Edi Rama?! Koha për retorikë po skadon, numërimi mbrapsht ka filluar, dhe, sot, përgjigjen do ta nxjerrë nga goja vetëm SPAK, ndërsa mundësia që Lali Eri të ndikoj është aq sa kishte Marie Antoinette në shuarjen e Revolucionit!
