Reuten: Presidenti serb Vuçiç destabilizon rajonin!

Deputeti holandez i Parlamentit Evropian, Thijs Reuten, ka reaguar ashpër pas deklaratës së Komisionerit për Zgjerimin e Fqinjësinë në BE, Oliver Varhelyi, pas deklaratës së të hënën me përfundimin e takimit me Presidentin e Serbisë, Aleksandar Vuçiç, në Beograd.

“Presidenti serb Vuçiç, destabilizon rajonin, manipulon zgjedhjet, instalon qeverinë proruse me dy ministra të sanksionuar nga SHBA, flirton me klubin autokrat BRICS, lëpinë çizmet diktatorin Xi Jinping”, thekson Thijs Reuten përmes rrjetit social X.

Ndryshe, Komisioneri për Fqinjësi dhe Zgjerim në BE, Oliver Varhelyi, tha dje në Beograd se Serbia, si vend kandidat për anëtarësim në Bashkimin Evropian, duhet të harmonizojë politikën e jashtme me atë të Bashkimit Evropian, të përmirësojë demokracinë si dhe sundimin e ligjit, dhe shpreson se deri në fund të mandatit të legjislaturës së re të Komisionit Evropian, ajo do jetë pjeë e BE.

Ndërsa për Rezolutën për gjenocid në Srebrenicë, që do të diskutohet nesër në Kombet e Bashkuara, Varhelyi ishte më serb se vetë Vuçiçi:

“Nuk pajtohem aspak me stigmatizimin e popullit serb kur është fjala për rezolutën për Srebrenicën. Faji kolektiv dhe ndëshkimi kolektiv nuk kanë qenë asnjëherë pjesë e vlerave tona. Mirëpo, fajtorët duhet të mbajnë përgjegjësi për atë që kanë bërë!”