Shuhet personi më i moshuar në botë
Shuhet personi më i moshuar në botë! Spanjollja Maria Branyas Morera, e lindur në Shtetet e Bashkuara dhe që i mbijetoi dy luftërave botërore, ndërroi jetë në moshën 117 vjeçare, kanë bërë të ditur sot familjarët e saj.
“Maria Branyas na la. Vdiq ashtu siç deshti: në gjumë, qetë dhe pa dhimbje,” bënë të ditur familja në profilin e saj në rrjetin social X.
“Gjithmonë do ta kujtojmë për këshillat dhe mirësinë që kishte,” theksojnë familjarët.
Branyas, e cila njëzetë vitet e fundit jetoi në azilin e pleqëve Santa Maria del Tura në qytetin Oloto, në verilindje të Spanjës, të martën e kaluar tha se nuk ndjehej mirë.
Maria Branyas Morera is the supercentenarian who, at the age of 117 years, 73 days, became the world's oldest verified living person since the death of Lucile Randon (1904–2023).
— Massimo (@Rainmaker1973) May 16, 2024
There are some of her photos across two centuries.pic.twitter.com/R0ty3B5oEG
“Momenti është afër, Mos qani, nuk i dua lotët. Dhe, mbi të gjitha, mos vuani për mua. Kudo që të shkoj, do jem e lumtur,” shkruante ajo në profilin e saj në rrjetin social X”
Libri i rekordeve Guinness, në janarin e vitit 2023, zyrtarisht e ka pranuar statusin e saj të personit më të moshuar në botë, pas vdekjes së murgeshës franceze Lucila Randon, në moshën 118 vjeçe.
113 vjeçe me COVID-19
Maria Branyas Morera e cila i mbijetoi gripit të vitit 1918, luftën e I-rë dhe të II-të Botërore, si dhe luftën qytetare në Spanjë, në vitin 2020 u prek nga COVID-19, vetëm disa ditë pasi festoi ditëlindjen e 113-të, dhe u detyrua të mbyllet në dhomën e saj, por, u shërua plotësisht.
Vajza e saj më e vogël, Rosa Moret, tha se jetëgjatësia e saj lidhet me gjenetikën.
“Kurrë nuk ka shkuar në spital, kurrë nuk e ka thyer një kockë, mirë është, nuk ka dhimbje,” tha Moret në vitin 2023 për një televizion rajonal katalonez.
Manel Esteller, pjesë e ekipit të studiuesve nga Unviersiteti në Barcelonë që ka studiuar ADN-në e Branyas për të përcaktuar shkaqet e jetëgjatësisë së saj, tha në tetorin e vitit 2023 për gazetën spanjolle ABC se ishte befasuar me shëndetin e saj të plotë.
“Mendja e saj është plotësisht e kthjellët. Ajo me qartësi të jashtëzakonshme kujton momentet nga koha kur ishte vetëm 4 vjeçe, dhe nuk ka sëmundje kardiovaskulare, që është e zakonshme te personat e moshuar. Problemet e vetme që ka janë lëvizshmëria dhe dëgjimi. Kjo është e jashtëzakonshme,” tha profesoresha e gjenetikës.
Pas vdekjes së Maria Branyas, personi më i vjetër në botë tani është japonezja Tomiko Itooka, e cila ka lindur më 23 maj të vitit 1908 dhe është 116 vjeçe, sipas US Gerontology Research Group.
Personi më i moshuar që ka jetuar ndonjëherë ishte francezja , Jeanne Louise Calment, e cila ndërroi jetë në vitin 1997 kur ishte 122 vjeçe e 164 ditë.
Ndryshe, Maria Branyas Morera ka lindur në San Francisco më 4 mars të vitit 1907, vetëm pak kohë pasi familja e saj u transferua nga Mexico në Shtetet e Bashkuara. Familja vendosi të kthehet në vendlindje, Spanjë, në vitin 1915 kur Lufta e I-rë Botërore kishte filluar, gjë që vështirësoi edhe udhëtimin me anije përmes Atlantikut.
Në këtë udhëtim u shënua dhe një tragjedi, babai i saj nga fundi i udhëtimit vdiq nga tuberkulozi ndërsa trupi i tij i pajetë u gjuajt në det. Branyas dhe mamaja e saj u vendosën në Barcelonë.
Në vitin 1931, pesë vjetë para fillimit të luftë qytetare në Spanjë, u martua me një mjek. Çifti jetoi së bashku 40 vjet deri sa bashkëshorti i saj ndërroi jetë në moshën 72 vjeçare. Kishin tre fëmijë, duke përfshirë dhe njërin që ju vdiq, 11 nipër e shumë stërnipër.
