Vizitë në SHBA, Albin Kurti në Waterbury nderohet me Çelësin e Qytetit
Kryeministri i Kosovës, Albin Kurti, u prit nga bashkatdhetarë të shumtë në Waterbury të Connecticut ku dhe u nderua me “Çelësin e Qytetit” nga kryetari Paul K. Pernerewski Jr.
Kryeministri Kurti falemnderoi bashkatdhetarët për pritjen e përzemërt në Qendrën Kulturore Shqiptaro-Amerikane “Hasan Prishtina” në Waterbury, Connecticut, Kryetarin e Qytetit, Paul K. Pernerewski si dhe Senatorin Richard Blumenthal për praninë e tyre dhe fjalët e tyre mbështetëse dhe për nderimin me Çelësin e Qytetit.
“Ne e dimë që ju jeni jashtë atdheut, por po ashtu e dimë që ju jeni brenda kombit dhe duke qenë brenda kombit kemi përgjegjësi për njëri tjetrit, e duhet të punojmë bashkë sa më shumë për një kontribut sa më të madh edhe shoqëror e familjar por e dhe shtetëror e kombëtar ashtu që shqiptaria që do t’ia lëmë brezave pas nesh të jetë shumë më e mirë se sa ajo që e kemi gjetur,” tha Albin Kurti në fjalën e tij duke shtuar se gjatë këtyre tre viteve e gjysmë të qeverisjes së tij kanë bërë përpjekje që të japin shembullin e kontributit për vendin, duke investuar aty ku ka më shumë nevojë.
Duke reflektuar mbi të arriturat e shtetit të Kosovës 25-vjet pas çlirimit, Kryeministri Kurti tha se Kosova është histori e dyfishtë suksesi, i ndërhyrjes së NATO-s që e ndali gjenocidin e Serbisë, dhe, rritjes ekonomike të kombinuar me progres demokratik.
“Për të dy këto rrëfime të suksesit, në zemër të tyre i kemi SHBA-të, që ishin aleati, miku dhe partneri ynë më i madh dhe i pazëvendësueshëm, edhe për çlirim e pavarësim, por edhe për zhvillim e demokratizim. Andaj faleminderit Shteteve të Bashkuara të Amerikës me të cilat ne gjithnjë ndajmë vlera, interesa, parime dhe qëllime të përbashkëta.”
Ndryshe, në takimin e organizuar nga mërgata në Qendrën Kulturore Shqiptaro-Amerikane “Hasan Prishtina” në Waterbury të Connecticut, Kryeministri Albin Kurti ishte i shoqëruar nga Zv.Kryeministrja dhe ministren e Punëve të Jashtme dhe Diasporës, Donika Gërvalla, Zv/ministrja Liza Gashi, dhe Konsulli i Përgjithshëm i Kosovës në New York, Blerim Reka.
