Konjufca: Sulmi terrorist në Banjskë, identik me pushtimin rus të Krimesë

Pasojat e agresionit të Rusisë ndaj Ukrainës kanë ndikuar në Kontinentin Evropian në paqe e siguri, në politikë e gjeopolitke, më shumë se sa në luftën e dytë botërore, tha Kryetari i Parlamentit të Kosovës, Glauk Konjufca, në konferencën “Ndikimi i agresionit rus në Ukrainë në gjeopolitikën evropiane”, organizuar nga Instituti për Studimet e Luftës Hibride “Octopus”.

Ndërsa përfaqësues vendor e ndërkombëtarë dhanë pikëpamjet dhe mendimin e tyre rreth pushtimit rus ndaj shtetit ukrainas, Glauk Konjufca përmendi sulmin terrorist të një viti më parë në Banjskë, nga një formacion paraushtarak serb, duke theksuar se skenari i kësaj ngjarje është identik me pushtimin rus të Krimesë në vitin 2014.

“Sulmi terrorist që ndodhi ndaj Kosovës në Banjskë vitin e kaluar ishte një replikë identike e sjelljes agresore të Rusisë kundër Ukrainës. Trupat paramilitare serbe të trajnuar nga ushtria serbe, të pajisur me arsenal luftarak të ministrisë serbe të mbrojtjes, si dhe me zbatimin e aspiratës së Beogradit me nda Kosovës e synuan në mënyrë të hapur dhe mënyrë luftarake aneksimin e pjesës veriore të Kosovës,” tha Konjufca duke shtuar se agresioni pushtues i Rusisë në Ukrainë paraqet aktin e parë të një strategjie të destabilizimit më të gjerë të Evropës, dhe Ballkani me qendër Serbinë si një zgjatim i Rusisë do të ishte kapitulli i dytë i kësaj strategjie.

“As Rusia dhe as Serbia nuk kanë hequr dorë nga kjo strategji sepse as Rusia s’ka hequr dorë nga bota ruse dhe as Serbia s’ka heq dorë nga bota serbe. Bile mendoj se ky termi bota serbe, që u prezantua edhe zyrtarisht nga autoritetet e Serbisë është një kopjim i botës ruse.”

Me këtë rast, Kryetari i Parlamentit të Kosovës konstatoi se Rusia dhe Serbia janë të njëjta në metoda dhe qëllime ndërsa me mosvendosjen e sanksioneve ndaj Rusisë, Beogradi është bërë kryeqytet i dytë i Rusisë në Evropë ndërsa përfundoi:

“Për ata që nuk e shohin të mirëqenë krahasimin e Rusisë me Serbinë në metoda dhe qëllime. Zakonisht e përmendin faktin se Serbia po dërgon armë në Ukrainë, por këtu anashkalohet fakti se deri tash Serbia nga ky biznes i fitoi mbi 1 miliard euro. Andaj këtu nuk flitet për asnjë donacion, por për një veprimtari e cila unë jam i bindur se para se të bëhej është koordinuar plotësisht me Federatën Ruse.”