I dërguari amerikan për Ballkanin Perëndimor takim me liderët e opozitës në Kosovë
Në ditën e dytë të vizitës në Kosovë, I dërguari amerikan për Ballkanin Perëndimor, Alexander Kasanof, ka zhvilluar takime të ndara me liderët opozitarë ku ashtu si me Presidenten Vjosa Osmani dhe Kryeministrin Albin Kurti, diskutoi për forcimin e aleancës me Shtetet e Bashkuara dhe rëndësinë e bashkëpunimit të ngushtë për t`i përmbushur synimet e përbashkëta strategjike.
“Në Ambasadën e Shteteve të Bashkuara të Amerikës, së bashku me Bedriun dhe Vlorën, takuam Zëvendësndihmës Sekretarin e SHBA-së, Alexander Kasanof. Bashkë diskutuam për zhvillimet aktuale në Kosovë dhe rajon. Në takim ritheksova nevojën e shtetit të Kosovës për bashkërendim të qëndrimeve me aleatët tanë strategjikë, e veçanërisht me SHBA-në. Kosova, si një storie suksesi është rezultat i bashkëpunimit të mirë dhe partneritetit të besueshëm me miqtë e saj,” tha Kryetari i PDK-së, Memli Krasniqi, duke shtuar se ka falënderuar Zv/ndihmës Sekretarin e Shtetit, Kasanof, për mbështetjen e vazhdueshme të Shteteve të Bashkuara në fuqizimin shtetit ndërsa përfundoi:
“Edhe e ardhmja nuk duhet të jetë ndryshe, përveçse një rrugëtim i përbashkët drejt sukseseve të reja.”
Edhe kryetari i Lidhjes Demokratike të Kosovës, Lumir Abdixhiku, u takua me zëvendësndihmës sekretarin e Departamentit Amerikan të Shtetit, njëherit i dërguari i SHBA-ve për Ballkanin Perëndimor, Alexander Kasanof, të cilin e uroi për detyrën e re dhe i ofroi bashkëpunim të ngushtë të LDK-së në çështjet strategjike vitale për të dy vendet.
Nërsa Kryetari i LDK, Lumir Abdixhiku, pas takimit foli për shqetësimin e diskutuar të LDK-së lidhur me raportin e dëmtuar të Qeverisë së Kosovës me Shtetet e Bashkuara, si dhe partnerët e tjerë strategjikë politikë dhe të sigurisë.
“Kryetari Abdixhiku e siguroi Kasanof se, me formimin e qeverisë së re, të drejtuar nga LDK-ja, pas zgjedhjeve të 9 shkurtit, riparimi i këtyre raporteve do të jetë çështje e prioritetit më të lartë. Kryetari Abdixhiku, po ashtu, e njoftoi Kasanof për ecurinë e përgatitjeve për fushatën parazgjedhore, për takimet me qytetarët gjithandej Kosovës, si dhe për shtyllat kryesore të programit politik ‘Rruga e re’. Abdixhiku theksoi se partneriteti strategjik me SHBA-të në fushën e ekonomisë, të energjisë dhe të sigurisë është jetik për LDK-në dhe për Kosovën,” theksn LDK përmes një njoftimi.
Ndërkohë Kryetari i AAK-së Ramush Haradinaj u shpreh qartë pas takimit me Kasanof se e vetmja rrugë e Kosovës për të arritur synimet si shtet, është bashkëpunimi dhe partneriteti me SHBA.
“Sot në Ambasadën Amerikane takuam Zv/Ndihmës Sekretarin e Shtetit, z. Alexander Kasanof. Shfrytëzova rastin që në takim t’i falënderoj z. Kasanof dhe Ambasadorin z. Hovenier për angazhimin e tyre ndaj Kosovës,” shprehet Ramush Haradinaj pas takimit duke shtuar se mbështetja e fuqishme e SHBA ndaj popullit të Kosovës vazhdon përkundër vështirësive të panevojshme, siç tha, që i ka shkaktuar qeveria ndërsa përfundoi:
“E vetmja rrugë për të arritur synimet tona si shtet, është bashkëpunimi dhe partneriteti me SHBA-të, si aleati ynë strategjik dhe i përjetshëm.”
Ndryshe, I dërguari amerikan për Ballkanin Perëndimor, Alexander Kasanof, si sot ashtu dhe në ditën e parë të vizitës në Kosovë, zhvilloj takime me Presidenten e Kosovës, Vjosa Osmani, dhe Kryeministrin Albin Kurti, me qëllim të parandalimit të konflikteve të mundshme në rajon dhe gjetjen e një mënyre për të ecur përpara në dialogun ndërmjet Kosovës dhe Serbisë, me kërkesën amerikane që palët të zbatojnë marrëveshjen që u arrit vitin e kaluar në Bruksel dhe në Ohër, për normalizimin e marrëdhënieve ndërmjet tyre.
