Sot Prishtina më afër Shkupit, Edi Rama kujdeset ta lë sa më larg me Tiranën!
Qeveria e Kosovës dhe ajo e Maqedonisë së Veriut sot do të mbajnë mbledhje të përbashkët në Prishtinë ndëkohë tradita e mbledhjeve të përbashkëra Shqipëri-Kosovë u ndërpre në mënyrë të njëanshme nga Kryeministri Edi Rama dy vjet më parë, i zemëruar pse Kryeministri Albin Kurti po luftonte krimin serb në Veri të Kosovës.
Dhe, deri sa me mbledhjen e sotme banorëve të brezit kufitar Kosovë-Maqedoni e Veriut do t’u lehtësohet lëvizja me hapjen e pikave të përbashkëta të kalimit kufitar Hani i Elezit – Bllacë dhe Glloboqicë – Jazhincë, pas anulimit të mbledhjes së dy qeverive Shqipëri-Kosovë në 2 Qershorin e vitit 2022 në Gakovë, Edi Rama jo vetëm që nuk kërkoi falje pas sulmit terrorist serb të 24 shtatorit ku rezultoi se Albin Kurti kishte të drejtë që i vendosi masa Kosovës, por banorëve të Malësisë së Gjakovës u vështirësoi edhe më shumë jetën!
Sot, banorët e të dy anëve të kufirit, më lehtë e kalojnë çdo kufi fundor evropian si në Itali, Kroaci, Slloveni, Hungari, Rumani, Bullgari dhe Greqi se sa atë në Qafën e Morinës; Pikë kjo e kalimit kufitar Shqipëri-Kosovë që të shpie në qytetin e vetëm ku e gjithë Tropoja mbanë jetën, Gjakovë!
Dhe, sot kur nuk dihet ende se kur do të marrë leje Edi Rama nga Presidenti i Serbisë, Aleksandar Vuçiç për të zhvilluar mbledhjen e radhës me Kosovën, Zyra e Kryeministrit të Kosovës, Albin Kurti, e ka bërë të ditur agjendën për mbledhjen e përbashkët e cila nis në orën 10:30 në Prishtinë:
Agjenda:
10:30 – Mbërritja e delegacioneve
10:50/ 55 – Mbërritja e kryeninistrave Albin Kurti dhe Hristijan Mickoski
11:00 – Ceremonia zyrtare e mirëseardhjes nga kryeministri Kurti
11:10 – Fotografia e përbashkët
11:20 – Takimi bilateral ndërmjet kryeministrave Kurti dhe Mickoski
11:20 – Takime bilaterale ndërmjet ministrave (homologëve) të qeverive
12:00 – 13:30 Takimi Ndërqeveritar / G2G ndërmjet Qeverive
13:30 – Nënshkrimi i marrëveshjeve bilaterale
13:45 – Konferenca e përbashkët për shtyp kryeministrave Kurti dhe Mickoski.
Ndryshe, mbledhjet e përbashkëta të dy qeverive filluan të zhvillohen në vitin 2014, me simbolikë të fortë patriotike në qytetin e Lidhjes së Prizrenit, “Qyteti i Lidhjes ju mirëpret”.
Por, sa kishte patriotizëm në këtë mes përveç fasadës si në Prizren ashtu dhe mbledhjet e radhës në Tiranë, Prishtinë, Korçë, Pejë e Elbasan tregoi dhe fakti se Kryeministrat e Kosovës me kabinetet e tyre paguanin edhe taksën në Rrugën e Kombit, për çdo takim!
