Shefi shërbimit sekret të Britanisë: Rusët po kryejnë akte sabotimi në të gjithë Evropën

Rusia po zhvillon një “fushatë të mahnitshme” sabotazhi në Evropë, ndërkohë që “vringëllon me armët e saj bërthamore për të frikësuar vendet që ndihmojnë Ukrainën,” tha sot shefi i Shërbimit sekret britanik.

Richard Moore, kreu i Shërbimit sekret britanik MI6, tha sot në Paris se Putini nuk do të ndalet nëse arrin ta kthejë Ukrainën në një shtet vasal.

“Siguria jonë, britanike, franceze, evropiane dhe transatlantike, do të kërcënohet,” tha ai duke shtuar:

“Kemi zbuluar kohët e fundit një fushatë mahnitëse të pamatur të sabotimit rus në Evropë, madje edhe deri sa Putin dhe ndihmësit e tij përdorin vringëllimën e armëve bërthamore për të mbjellë frikë nga pasojat e ndihmës së Ukrainës,” tha Moore.

“Nëse Putin ia del…”
Moore thotë se kostoja e mbështetjes së Ukrainës është e njohur mirë, por ai vuri në dukje se kostoja për të mos bërë asgjë do të ishte pafundësisht më e madhe.

“Nëse Putini ia del mbanë, Kina do të peshojë pasojat, Korea e Veriut do të trimërohet dhe Irani do të bëhet edhe më i rrezikshëm,” paralajmëron Moore.

Fjalimi i Moore duket se kishte për qëllim grumbullimin e aleatëve të lëkundur evropianë dhe të gjithë skeptikëve në administratën e re amerikane të Donald Trump, për rëndësinë e Ukrainës. Ai iu bashkua shefave të tjerë të shërbimeve sekrete perëndimore në paralajmërimin për një rritje të sabotimit rus.

NATO dhe shërbimet sekrete perëndimore janë shprehur se Rusia qëndron pas një numri në rritje të aktiviteteve armiqësore në të gjithë rajonin euro-atlantik, nga sulmet kibernetike deri te zjarrvëniet e lidhura me Moskën. Rusia mohon gjithçka.

“GRU ruse po përpiqet të shkaktojë kaos në Evropë”
Shefi i shërbimit sekret britanik tha në muajin tetor se Shërbimi sekret ushtarak rus, GRU, po përpiqej të shkaktonte “kaos” në të gjithë Britaninë dhe Evropën.

Burime të njohura me Agjencitë e inteligjencës amerikane janë shprehur për Reuters këtë javë se Rusia me siguri se do të zgjerojë fushatën e saj të sabotimit kundër objektivave evropianë për të rritur presionin ndaj Perëndimit për mbështetjen e tij për Kievin.

Moore, shtoi, se bashkëpunimi midis Britanisë së Madhe dhe Shteteve të Bashkuara i ka bërë shoqëritë e tyre më të sigurta dhe do të vazhdojë ta bëjë këtë.

“Kam punuar me sukses me administratën e parë Trump për të avancuar sigurinë tonë të përbashkët dhe mezi pres ta bëj këtë përsëri,” tha ai.