NATO: Rusia po përgatitet për një luftë afatgjatë me Ukrainën dhe Evropën
Sekretari i Përgjithshëm i NATO-s, Mark Rutte, paralajmëroi se presidenti rus Vladimir Putin dëshiron të fshijë Ukrainën nga harta dhe ai i bëri thirrje aleancës të kalojë në një mentalitet të kohës së luftës dhe të rrisë prodhimin dhe shpenzimet në fushën e mbrojtjes.
“Rusia po përgatitet për një konfrontim afatgjatë, me Ukrainën dhe me ne,” tha Mark Rutte, duke shtuar se evropianët duhet të përgatiten për mundësinë që Rusia të përdorë ushtri dronësh në kontinent. Putini, shtoi ai, po përpiqet të godasë lirinë dhe mënyrën tonë të jetesës.
“Ne nuk jemi gati për atë që do të na vijë pas katër deri në pesë vjet”, tha ish-kryeministri holandez, i cili paralajmëroi se shtetet e NATO-s mund të kenë nevojë të shpenzojnë më shumë se 2 për qind të prodhimit të brendshëm bruto në fushën e mbrojtjes. NATO tani kërkon nga vendet e saj anëtare që të shpenzojnë 2 për qind të prodhimit të brendshëm bruto në mbrojtje.
Gjatë Luftës së Ftohtë, tha Mark Rutte, evropianët shpenzuan më shumë se 3 për qind të prodhimit të brendshëm bruto për mbrojtjen, një nivel që është kërkuar edhe nga Presidenti i zgjedhur i Shteteve të Bashkuara, Donald Trump për vendet anëtare të NATO-s.
Vetëm 23 nga 32 anëtarët e NATO-s pritet të përmbushin objektivin prej 2 për qind këtë vit, sipas zyrtarëve të aleancës.
Udhëheqësi i NATO-s u bëri thirrje gjithashtu qeverive të vendeve anëtare të aleancës që të rrisin buxhetet e tyre ushtarake, duke paralajmëruar se Rusia ndoshta do të shpenzojë deri në 7% ose 8% të prodhimit të brendshëm brute për mbrojtjen vitin e ardhshëm.
Rusia është tashmë e angazhuar në një “fushatë të koordinuar për të destabilizuar shoqëritë tona”, paralajmëroi Rutte, duke përmendur “veprimet armiqësore” të fundit që Moska ka ndërmarrë kundër anëtarëve të NATO-s, duke përfshirë sulmet kibernetike dhe tentativat për vrasje.
“Rreziku po lëviz drejt nesh me shpejtësi të madhe”, paralajmëroi Mark Rutte. “Ne nuk do të jemi të sigurt në të ardhmen nëse nuk jemi të përgatitur të përballemi me këtë rrezik.”
Ndërkohë Administrata e presidentit të Shteteve të Bashkuara Joe Biden njoftoi një tjetër ndihmë ushtarake për Ukrainën, me vlerë 500 milionë dollarë, tha përmes një deklarate Sekretari i Shtetit Antony Blinken.
Zëdhënësi i Shtëpisë së Bardhë, John Kirby, tha më herët se Shtetet e Bashkuara do të vazhdojnë të ofrojnë ndihma shtesë për Ukrainën “deri në fund të mandatit të kësaj administrate”.
Washingtoni tha 10 ditë më parë se do t’i dërgonte Ukrainës raketa, municione, mina dhe armë të tjera me vlerë 725 milionë dollarë.
Administrata në largim e Presidentit Biden po përpiqet të forcojë Ukrainën në luftën e saj kundër agresionit rus, përpara se mandati i Presidentit Biden të përfundojë më 20 janar, kur Presidenti i zgjedhur republikan Donald Trump do të marrë detyrën./VOA/
