Vendimi, Qeveria e Kosovës: Pensionet e kategorisë së luftës rriten 20%
Qeveria e Kosovës sot ka miratuar rritjen me 20 për qind të pensioneve të dëshmorëve, invalidëve, veteranëve, pjesëtarëve të Ushtrisë Çlirimtare të Kosovës, viktimave civile dhe familjeve të tyre.
Ministri i Financave, Hekuran Murati, duke dhënë detaje ka sqaruar se pagesat do të fillojnë nga ky muaj.
“Do të rriten pensionet familjare për familjarët e dëshmorëve të UÇK-së, duke filluar nga një familje që ka dhënë një dëshmor rritja do të jetë 20%, kurse familjet që kanë dy e më shumë dëshmorë, rritja do të jetë përtej 20 për qind,” tha Hekuran Murati duke saktësuar se pensionet e para fillojnë në datën 15 të muajit ndërsa shtoi:
“Nëse flasim me shifra, te familja që ka dhënë një dëshmor pensioni ka qenë 448 euro, do të bëhet 537 euro. Te familja që ka dhënë dy dëshmorë ka qenë 537 euro, ndërkaq do të bëhet 806 euro. Familja që ka dhënë tre dëshmorë ka qenë 582 euro, ndërkaq do të bëhet 1075 euro. Familja që ka dhënë katër dëshmorë ka qenë 627 euro, do të bëhet 1344 euro dhe familja që ka dhënë më shumë se katër dëshmorë ka qenë 672 euro, do të bëhet 1613 euro,” tha Ministri i Financave, Hekuran Murati, duke përfunduar:
“Do të rriten të gjitha kategoritë për pensionet invalidore me 20 për qind si dhe shtesat për përkujdesje dhe ndihmë për invalidët e UÇK-së, pra kujdestari do të ketë rritje prej 20 për qind.”
Ndërsa Gjykata Penale e Brukselit dje ka nisur procedurat për rishqyrtimin e rastit të Veselin Vukotiçit dhe Andria Drashkoviçit, të cilët akuzohen si dy nga katër autorët e vrasjes së Enver Hadrit, sot Qeveria e Kosovës ka miratuar vendimin për ndarjen e mjeteve financiare për mbulimin e shpenzimeve për mbrojtjen juridike për familjarët e veprimtarit të vrarë, Enver Hadri, 100 mijë euro.
“Ky rast ka rëndësi historike për vendin, andaj kemi vendosur që ta mbështesim familjen në këtë proces të rëndësishëm,” tha ministrja e Drejtësisë, Albulena Haxhiu në arsyetimin e këtij vendimi të Qeverisë.
Ndërkohë, sot Qeveria e Kosovës ka emëruar Drejtorin e Agjencisë së Statistikave të Kosovës, Avni Kastrati, i cili deri më tani ka qenë ushtrues detyre, si dhe Inspektorin e Përgjithshëm në Zyrën e Kryeministrisë, Lyra Osmani.
