Në “Sikorsky – Lockheed Martin”, Ministri i Mbrojtjes: Kosova do të ketë helikopterë Black Hawk!

Pas vizitës në fabrikën “Sikorsky – Lockheed Martin” ku prodhohen dhe helikopterët Black Hawk, Ministri i Mbrojtjes, Ejup Maqedonci, në përmbyllje të vizitës në SHBA tha se Kosova do t`i ketë këta helikopterë transportues dhe ushtarak në flotën e mbështetjes ajrore të ushtrisë.

“Në përmbyllje të vizitës në SHBA, e vizitova fabrikën “Sikorsky – Lockheed Martin”, ku prodhohen helikopterë të ndryshëm, ndër të cilët edhe helikopterët Black Hawk, që do t’i kemi në flotën e mbështetjes ajrore të ushtrisë së Kosovës.

Së bashku me Gjenerallejtënant Bashkim Jasharin dhe Ambasadorin Blerim Reka, shef i Misionit të Konsullatës së Përgjithshme të Kosovës në New York, takuam menaxhmentin e kësaj kompanie, ku diskutuam për opsionet e përfshirjes së helikopterëve në inventarin e Forcës së Sigurisë së Kosovës,” u shpreh përmes rrjetit social Facebook duke përfunduar:

“Kosova do të jetë më e sigurt me helikopterët që fluturojnë mbi qiellin e saj.”