Pasi akuzoi ndërkombëtarët, Kryeministri i Serbisë jep dorëheqje të parevokueshme
Kryeministri i Serbisë, Milosh Vuçeviç, tha se jep dorëheqje të parevokueshme pas sulmit të mbrëmshëm ndaj studentëve në Novi Sad ndërsa akuzoi ndërkombëtarët për gjithçka që kanë ideuar rreth studentëve.
Në një konferencë të jashtëzakonshme për media, Milosh Vuçeviç tha se kishte një takim të gjatë me Presidentin e Serbisë, Aleksandar Vuçiç, ku ai e pranoi vendimin dhe argumentet për dorëheqjen e tij.
“Kështu mendoj se ne tregojmë përgjegjshmërinë e atyre që janë zgjedhur për të qenë të përgjegjshëm,” tha Vuçeviç duke shtuar se politikanët duhet të tregojnë gatishmëri për uljen e tensioneve.
“Ajo që lë pasoja të thella për shoqërinë është ndarja serioze. Absolutisht është ideuar jashtë shtetit, projektuar me ligësi, është godituru arsimi. Moskuptim i njërës palë me tjetrën, debate dhe konflikte në gjithë Serbinë. Sado që kemi bërë thirrje për qetësim, gjithmonë sipas një skenari të keq ka ndodhur diçka. Sikur një dorë e padukshme e krijonte incidentin e ri dhe krijoi tensione në shoqëri,” tha Milosh Vuçeviç.
Kryeministri i Serbisë, Milosh Vuçeviç, gjithçka tha në këtë dalje publike por jo dhe arsyen pse tragjedia në Novi Sad ishte pika që derdhi gotën studentore të mbushur me pakënaqësi, dhe pse protesta e studentëve në Beograd që çdo ditë po shtohej në numër, u bë masive në çdo qytet të Serbisë përkundër kundërmitingjeve që organizoi Presidenti i Serbisë, që sot është dhe arsyeja kryesore pse ai po digjet nga Presidenti i Serbisë!
Gjithsesi, zhbllokimi i nyjeve kryesore në Beogra filloi në orët e mëngjesit në pritje të plotësimit të zotimeve të Presidentit të Serbisë. Studentët që kanë protestuar nga 2 Nëntori i vitit 2024 pas tragjedisë në Novi Sad ku humbën jetën 15 qytetarë pas shembjes së strehës në Stacionin e Trenit, shprehen të gatshëm t’i rikthehen protestave nëse nuk plotësohen kërkesat e tyre.
Ndryshe, kjo dorëheqje e Kryeministrit të Serbisë, Milosh Vuçeviç, vjen pas konferencës së djeshme për media me Presdentin Aleksandar Vuçiç dhe Kryeparlamentaren Ana Brnabiç ku u zotuan për plotësimin e kërkesave të studentëve.
Presidenti i Serbisë, Aleksandar Vuçiç, tha se Prokuroria ka ngritur 13 aktakuza kundër personave përgjegjës për shkak të fatkeqësisë në Novi Sad, dhe tre muaj pas tragjedisë klima nuk është e mirë. Paralajmëroi firmosjen e amnistisë për 13 studentët dhe profesorët pjesëmarrës në protesta. Me këtë rast ai kërkoi ndryshimin e gjysmës së qeverisë ndërsa Kryeministr Vuçeviç i bëri thirrje studentëve për bisedime në Qeveri.
